Notas
-
A mostra Configuracións kármicas lugildianas recolle unha selección de cadros e esculturas da última etapa do artista lucense José María Lugilde, caracterizada polo "Kousismo". Pódese ver ata o 1 de febreiro na Casa de Galicia en Madrid. -
O Premio José Domínguez Guizán de Arte, na modalidade de pintura, foille concedido a Ainhoa Pérez Sánchez (Noa Persán), de Lugo, pola obra Improntas atemporais. -
A pesar da redución do orzamento nun 30%, a optimización de recursos permitiu que a actividade cultural do Gaiás medrase o ano pasado un 14%. O programa cultural favoreceu a contratación de 317 empresas e 620 artistas. -
A Real Academia Galega (RAG) segue contando coa colaboración do Goberno galego no desenvolvemento das diferentes actividades e celebracións que organicen, como a do Día 17 de Maio, e tamén na súa financiación con case 900.000 euros, o que implica un aumento das prestacións frente á crise.
-
Concedido pola International Union of Folklore Associations, o galardón Oscar Internacional do Folclore 2012 recoñece o labor de Queixumes dos Pinos de recuperación e posta en valor da cultura tradicional galega. Foi entregado na localidade portuguesa de Guimaraes.
-
A Consellería de Cultura e Educación colaborará coa Fundación Penzol e co Concello de Lourenzá na celebración do centenario do nacemento de Francisco Fernández del Riego, co obxectivo de difundir o labor dunha das figuras máis senlleiras da cultura galega no século XX. -
A través dos traballos presentados nas distintas modalidades de literatura, fotografía e curtametraxes, esta asociación ecoloxista (Adega), en colaboración coa Deputación Provincial de Lugo, pretende promover a defensa do territorio. -
Preséntase o 9 de xaneiro no Museo do Pobo Galego o novo volume titulado A luminosa mirada dos ollos de Isaac, dentro da colección Cadernos Ramón Piñeiro. Con esta obra lémbrase o labor deste intelectual. -
A obra de teatro ‘Avós... nunca é tarde’, para sensibilizar ás persoas maiores sobre a corresponsabilidade, forma parte dun programa da Secretaría Xeral da Igualdade para que as persoas maiores sexan transmisoras dos valores da educación libre de estereotipos, a través do seu labor de coidado dos seus netos e netas.
-
A delegada territorial do Goberno galego, Raquel Arias, inaugurou a exposición, da que destacou que “representa a capacidade de perpetuarse e estimular a creatividade cultural” nun momento como o actual. Está integrada por 21 cadros orixinais.
