Mayor Balboa, José Luis
General
PINTOR DOS SOÑOS LEDOS...
O 30 de Xaneiro de 1971 ve a luz por primeira vez na Cidade das Murallas, Cidade que vai ter unha gran influencia na súa obra futura, xa que Mayor Balboa amaba e debecíase pola súa terra natal.
Xa dende moi pequeno as bolboretas andaban a bulir pola súa cabeza, polo seu corazón infante, pola súa imaxinación e amosaba unhas inquietudes especiais que xa deixaban entrever esa futura alma de artista.
Pintaba todo o que caía nas súas máns, dende un ovo, ata as paredes do cuarto, pinturas xa cunha forte pegada creativa. Dicíame a súa nai que cando pintaba os ovos non sabía o que facer con eles, se comelos ou deixalos así, porque daba moita mágoa rompelos.
Escomenzou os seus primeiros estudios no Colexio da Milagrosa e xa por aqueles tempos a monxa tiña que vixilalo, porque pintaba os pantalóns dos rapaces, os seus propios e o mobiliario da súa clase.
Foi logo ós Irmáns Maristas, Colexio no que pasou oito anos da súa vida e onde gaña o seu primeiro premio de carteis, que levaba por título “Maristas, cen anos en España”. Aquí coñece ó seu amigo da alma, Luis Tosar, e a outros moitos cos que compartía a súa forma de pensar e de ve-la vida.
Dos Maristas pasa ó Instituto Femenino, onde fai a súa primeira exposición individual, para acabar sendo delineante, profesión que compaxinaba perfectamente coa pintura e na que podía amosa-las súas dotes creativas.
No ano 89 coñece á que vai se-la súa muller, o motor principal da súa vida, xa que entre eles existía unha total comunicación, unha total simbiose.
Fai moitas exposicións ó longo da súa curta esixtencia e preséntase a varios certamenes pictóricos. Déixanos unha extensa obra cun marcado influxo picassiano e na que leva ó color a súa máxima expresión.
Mesturando o cómic e o realismo, lévanos Mayor Balboa a vivi-los recordos da súa nenez, a entende-la súa forma tan especial de ser, de vivir, de sentir...
Era un namorado do arte en tódalas súas expresións; non só pintaba, senón que tamén esculpía, e compoñía música para a súa guitarra e o seu clarinete. Estas dotes musicais levárono a formar parte de dúas Corais lucenses de gran renome: “Cantigas e Frores” e a “Coral do Hospital Xeral-Calde”.
Pois xa que desgraciadamente non podemos disfrutar da súa presencia física, invito a cadaún de vós a acercarvos ós seus cadros, a cada unha das súas obras, para logra-la perfecta común-unión ca alma de Mayor Balboa, de ese gran pintor, de ese gran artista, pero sobre todo de esa gran persoa.
Ó achegarse a cada unha das súas obras, elas mesmas encargaránse de trasmitirnos o que Xosé Luis Mayor quixo mostrarnos en cada unha das pinceladas que deu sobre esos lienzos.
As bágoas aparecen e baixan polas meixelas ó escribir sobre él, pero sei que dende aló onde se atope estará ledo e feliz ó saber que o coñecemos e que o recordamos como o PINTOR DOS SOÑOS LEDOS, como él quixo.
Mayor Balboa, pintor aferrado á súa terra lucense, intenta a través desta mostra ensinárno-lo seu mundo interior, eses recordos da nenez que expresa a través da mestura do cómic e o realismo, elementos desordenados e de moito colorido.
Galicia, terra que serve de inspiración a moitos artistas galegos e estran-xeiros, xurdindo obras que paga a pena contemplar, mozos que traen novas ideas a este mundo tan cheo de inquietudes que é o mundo da arte.
As obras de Mayor Balboa transmiten unha forte vitalidade creativa con predominio de formas e cores primarias.
Jesús Pérez Varela
Conselleiro de Cultura, Comunicación Social e Turismo
Membro da Asociación de Artistas Plásticos lucenses, na que participa en tódalas súas actividades socioculturais que se levan a cabo nesta vila nomeada recentemente cidade Patrimonio da Humanidade.
A temática destas obras é moi variada, semella un crebacabezas e predominan os fondos negros e os elementos reais ou fantásticos colocándoos de forma desordenada evitando a realidade, mestura o fantástico co real, amosándonos a través da súa obra o seu mundo interior.
Para Mayor Balboa, un dos elementos que figuran nos seus cadros é unha lámpada, que dá a enerxía precisa e que o caracteriza.
Este pintor lucense está mui influenciado polo seu contorno, o San Froilán, a muralla e outros recordos da infancia como son "Xigantes e cabezudos", "O moucho birollo" así como outras obras que poderemos ollar na exposición.
Homero José Mª Pérez Quintana
Director Xeral de Promoción Cultural
