La Cidade da Cultura solicita la ayuda de voluntarios mayores de 65 años para protagonizar Don Juan, la obra de Teatro Voadora

Nota de prensa remitida por el Gabinete de Comunicación de la Xunta de Galicia:

A Cidade da Cultura convida a maiores de 65 anos que o desexen a participar no ‘Don Juan’ da compañía Voadora, unha das grandes propostas galegas que se estrearán para toda España na próxima edición do festival ‘Escenas do Cambio’ que terá lugar a finais de xaneiro no Museo Centro Gaiás en Santiago de Compostela.

Voadora, unha das compañías galegas que está a obter maior recoñecemento da crítica en Galicia, no resto de España e en Portugal, presentará o seu ‘Don Juan’ o 29 de xaneiro. Para protagonizar esta montaxe, a compañía de Marta Pazos, Hugo Torres e José Díaz busca estes días a persoas maiores de 65 años, que non precisan ter experiencia escénica, e que se atrevan a traballar nesta emotiva aventura, un proxecto que avanza na liña de traballo en comunidade e onde Voadora rompe de novos os códigos habituais do teatro.

Despois do éxito de súa versión contemporánea de ‘A Tempestade’ de Shakespeare, Voadora toma como punto de inspiración para esta peza o Don Juan de Molière, personaxe símbolo do hedonismo e da paixón por vivir. A partir desta figura, preséntase unha obra en torno ao tempo e ao amor, que busca cuestionar os tópicos que rodean a Terceira Idade, presentándoa como un tempo improdutivo para o retiro.

Voadora, Premio da Crítica en Galicia no eido das Artes Escénicas no 2013, constrúe sobre un relato verdadeiro, emotivo e fermoso no que se compromete co principio de que “nunca é tarde e nunca é cedo: sempre é o momento oportuno”. “Vivimos no occidente, un lugar onde se valora o novo, o rápido, a xuventude e a beleza. É deste xeito como se vive o amor no occidente, como se fósemos un restaurante de fast-food. Tal vez sexa hora de gozar dunha dose de slow food”, asegura a compañía no texto de presentación deste espectáculo.

Os interesados poden enviar un correo electrónico ao enderezo produccion3@cidadedacultura.org ou telefonear ao 653.278.678, onde recibirán toda a información necesaria.