El Centro Dramático Galego (CDG) abre la temporada 2012-2013 con O Profesional

Nota de prensa remitida por el Gabinete de Comunicación de la Xunta de Galicia:

O Centro Dramático Galego da Consellería de Cultura, Educación e Ordenación Universitaria ultima estes días os ensaios do equipo técnico e artístico dedicado á produción de O profesional. O espectáculo, versión galega da obra de Dusan Kovacevic baixo a dirección de Manuel Guede Oliva, abrirá a temporada 2012-13 da compañía pública o venres 5 de outubro coa súa estrea no Salón Teatro de Santiago.

Realizada en coprodución coa Companhia de Teatro de Braga, o elenco que integran Miguel Pernas, Ernesto Chao, Rebeca Montero e Rodrigo Roel desenvolven o seu traballo interpretativo sobre a tradución do texto orixinal asinada por Vladimir André Cejovic xunto a Anne Renoue e nunha escenografía deseñada polo arquitecto portugués José Carvalho Araújo.

Ao tempo que os ensaios entran na súa recta final, o Centro Dramático Galego está a realizar un intenso traballo de captación de público escolar, no marco do que desenvolverá dous pases previos á estrea, os días 1 e 3 de outubro, aos que están convidados principalmente profesores de ensino secundario de distintos centros galegos, así como outros mediadores culturais. O obxectivo é a preparación conxunta das funcións matinais que se desenvolverán especificamente no Salón Teatro para alumnos de ESO e bacharelato os días 10, 11, 17 e 18 de outubro.

Para este fin o CDG dispuxo xa na súa páxina web un material didáctico dixital, que ademais de explicar as claves do teatro de Kovacevic no seu contexto xeográfico e histórico, propón diferentes pautas para que os estudantes poidan seguir falando e reflexionando sobre a obra despois de asistir á montaxe.

Elaborado por Miguel Vázquez Freire, da Asociación Galega do Libro Infantil e Xuvenil (Gálix), o caderno pedagóxico contén así mesmo importantes referencias bibliográficas e todo tipo de documentación da época na que se desenvolve a acción de O profesional.

Ambientada no Belgrado de 1990, O profesional é a historia do encontro entre Teodor Teja Kraj, un antigo activista político na oposición ao réxime do mariscal Tito e acomodado agora entre as redes do poder, e Luka Laban, o policía que durante dúas décadas lle seguiu os pasos. Na versión galega, Miguel Pernas e Ernesto Chao darán vida aos que nunha época foron perseguido e perseguidor, pero que ven agora como se inverten os seus papeis neste novo momento histórico, inmediatamente anterior ao inicio da guerra dos Balcáns.

Rodrigo Roel, no papel de O Tolo, e Rebeca Montero, no da secretaria Marta completan o elenco que levará a escena este texto actual e cheo de matices, a través do que o CDG propón unha reflexión histórica e desde nós no ano no que se conmemora o vinte aniversario do inicio oficial da guerra de Bosnia.