Máis de 14.400 persoas visitaron en menos de dous meses 'Argallar', a exposición do Gaiás para xogar coa arquitectura

Estas posibilidades infinitas de construción e xogo coa arquitectura que ofreceu Argallar tiveron como obxectivo achegarlles á cativada e á centros escolares disciplinas como a arquitectura e a habitabilidade dun xeito lúdico e divertido. Ademais, permitiu demostrar que exposicións deste formato e con esta filosofía constitúen un xeito efectivo de rachar cos clixés de que os museos son espazos con contidos só para persoas adultas e pouco atractivos para pequenos e pequenas.

Encontro internacional con arquitectos e docentes

Esta exposición da Xunta de Galicia na Cidade da Cultura estivo organizada pola Asociación Ludantia, APLU-Axencia de Protección da Legalidade Urbanística e Proxecto Terra do Colexio Oficial de Arquitectos de Galicia. Precisamente, estas entidades organizaron tamén de cara ao final de Argallar un encontro internacional con profesionais e estudantes de arquitectura e de educación Primaria e Secundaria ao redor da mostra: Playgrounds.

Esta xornada espertou un alto interese, ata o punto de esgotar as 170 prazas dispoñibles do foro, que ofreceu durante dous días –o 1 e 2 de novembro– nove conferencias con expertos e expertas internacionais e 20 obradoiros, onde levaron a cabo casos prácticos para mellorar a arquitectura nas escolas, espazos públicos e incluso cidades pensando na infancia.

‘Argallar’ e ‘Galicia, un relato no mundo’

Con esta exposición, a Xunta de Galicia completou a oferta expositiva do Museo Centro Gaiás da Cidade da Cultura, tras o peche en setembro de Valor e mestría. Galicia como fútbol e Pensar coas mans. Cestería, cerámica e xoiería de Galicia, ata a inauguración, este xoves, día 14 de novembro, de Galicia, un relato no mundo, a primeira das tres grandes exposicións do Goberno galego no marco do Xacobeo 2021 e que estará aberta ao público a partir deste venres, 15 de novembro.