La Diputación Provincial de Ourense analiza la posibilidad de crear un premio de teatro con el nombre de Carlos Casares

Nota de prensa del Gabinete de Comunicación de la Diputación Provincial de Ourense:

A Deputación de Ourense estuda crear un premio de teatro infantil e xuvenil en lingua galega que leve o nome do escritor ourensán Carlos Casares, autor a quen se lle dedicou este ano o Día das Letras Galegas. A proposta é unha iniciativa da Asociación Galega de Literatura Infantil e Xuvenil (Gálix) que foi analizada na reunión que mantivo o presidente da Deputación de Ourense, Manuel Baltar, co presidente desta entidade cultural e da Organización Española para la Literatura Infantil (OEPLI), Xosé A. Perozo; co ilustrador Antonio Seijas, vicepresidente de Gálix; e cos editores Mercedes Pachego, de Auga Editora, e David Cortizo, de Urco.

O presidente do goberno provincial destacou a importancia "de seguir potenciando a figura de Carlos Casares, un dos grandes das nosas letras, escritor cuxa obra é para todos os públicos, motivo polo cal, entre todos temos a obriga de difundila e achegala ao maior número de persoas por medio de diferentes formatos literarios e artísticos, ademais de promover a creación e a innovación no ámbito cultural", afirma Manuel Baltar.

Este premio de teatro infantil e xuvenil tería carácter anual e a súa convocatoria coincidiría coa data de nacemento de Carlos Casares, o 24 de agosto, así como o ditame do xurado, na mesma data, en 2018. O Teatro Principal de Ourense acollería posteriormente, no nadal dese ano, a representación da obra premiada.

A Deputación de Ourense e Gálix valoran levar a cabo conxuntamente esta iniciativa cultural co obxectivo de fomentar a produción de textos dramáticos en galego dirixidos ao público infantil e xuvenil e propiciar a posta en escena dos mesmos, así como a súa edición en formato libro. Deste xeito a Deputación de Ourense segue o ronsel dunha vella tradición de fomento do teatro galego, que no século pasado tivo na provincia ourensá unha grande importancia para a cultura galega.