A XI Bienal Eixo Atlántico repartirá 7.500 euros en premios ás melloras obras de Galicia e Norte de Portugal

A organización transfronteiriza Eixo Atlántico repartirá 7.500 euros en premios ás mellores obras de Galicia e o Norte de Portugal que se presenten ó certame da súa XI Bienal de Pintura. Ademais, os gañadores verán a súa obra exposta na mostra de carácter itinerante que percorrerá parte das cidades da Eurorrexión, cun público potencial de sete millóns de persoas.

O primeiro galardón outorgarase á mellor obra do certame (3.000 euros), e os dous segundos á mellor obra de autor galego (1.500 euros) e á mellor obra de autor portugués (1.500 euros). Ademais, concederase o galardón ‘Novos Talentos Luso-Galaicos’ para novos artistas de idades comprendidas entre os 16 e 25 anos (1.500 euros).

Esta bienal, que naceu en 1995 para dar a coñecer a novos talentos e para axudar a visualizar de maneira periódica o estado da creación pictórica tanto de Galicia como do Norte de Portugal, consolidouse xa como unha do tres mostras de carácter itinerante máis importantes do norte peninsular.

Participantes

Esta nova convocatoria está aberta á participación de autores naturais ou residentes na Eurorrexión, coa condición de que concursen cun cadro orixinal e inédito, é dicir, que non presentasen a ningún outro certame.
Os interesados poderán formalizar a inscrición até o 28 de setembro. Pasado este prazo, un xurado formado por personalidades relacionadas co mundo da cultura e das artes plásticas de Galicia e Portugal, así como polo gañador da edición anterior, procederá a fallar os premios entre unha selección dun máximo de 30 obras, que constituirán o catálogo da XI Bienal.

O programa, un dos máis queridos e máis exitosos dos que puxo en marcha o Eixo Atlántico, non só fortaleceu os lazos artísticos entre Galicia e Norte de Portugal senón que actuou como xerador de actividade económica, tanto pola atracción de visitantes aos municipios que acollen a mostra como facilitando a inserción laboral dos novos talentos.

Na Bienal de Pintura colaboran co Eixo Atlántico, a Secretaría Xeral de Cultura e a Dirección Xeral de Xuventude e Voluntariado da Xunta de Galicia, a Fundação dá Juventude e os municipios asociados ó Eixo.