O auditorio Abanca de Santiago de Compostela acoge el preestreno de Hotel Almirante

A produtora galega Formato Producciones levou a cabo no Auditorio Abanca de Santiago de Compostela a preestrea da serie de televisión ‘Hotel Almirante’, que contou para o seu financiamento cunha subvención de 245.925 euros concedida en 2012 pola Axencia Galega das Industrias Culturais (Agadic) da Consellería de Cultura, Educación e Ordenación Universitaria.

O director da Agadic, Jacobo Sutil, acompañou o equipo artístico e técnico do filme neste acto de presentación, no que se amosaron as primeiras imaxes desta adaptación como miniserie televisiva de dous capítulos de 90 minutos da novela homónima da escritora lucense Marta Rivera de la Cruz. ‘Hotel Almirante’ está participada tamén por Televisión de Galicia, canle na que iniciará a súa emisión o próximo día 5 de abril.

Antonio Cuadri dirixe nesta proposta un reparto de actores e actrices galegos e de fóra de Galicia, entre os que se atopan Ana Turpin, Fernando Tato, Rosalía Castro, Xoque Carbajal, Mariana Expósito ou Antonio Mourelos. A película rodouse durante os pasados meses de outubro e novembro en distintas localizacións das provincias de Lugo e A Coruña. De feito, no Círculo de Belas Artes da capital lucense, onde se levou a cabo a maior parte da gravación, terá lugar mañá día 25 outra presentación do filme.

Ambientada nos anos 50, ‘Hotel Almirante’ conta a historia de Cristina Sanjuán, unha moza madrileña que escolle unha habitación do Hotel Almirante de Ribanova para rematar coa súa vida. Nunca antes estivera na cidade e ninguén a coñecía, pero Cristina tiña un motivo para querer que o escenario da súa morte fora precisamente aquel cuarto. A partir de aí, reconstrúese un apaixonante relato de amor, ao tempo que se desenvolve a crónica da vida do propio hotel, desde a súa fundación na segunda década do século XX ata os anos da posguerra.