Xunta y RAG renovan o seu compromiso na promoción, investigación e estudo do galego

O conselleiro de Cultura, Educación e Ordenación Universitaria, Xesús Vázquez Abad, e mais o presidente da Real Academia Galega (RAG), Xesús Alonso Montero, asinaron un acordo de transferencia de dotación de fondos da Administración autonómica á institución lingüística. En virtude del, a RAG contará cunha partida propia incluída nos orzamentos xerais da Xunta de Galicia destinada ao impulso e ao desenvolvemento dos proxectos de promoción, investigación e estudo do galego.

No exercicio actual, a Xunta destinaralle á RAG, desde a Consellería de Cultura, Educación e Ordenación Universitaria, un total de 560.000 euros. Destes 520.000 euros correspóndense co acordo asinado hoxe e mantendo así financiamento fornecido á institución durante o pasado 2013, e por outra banda á RAG contará cunha colaboración a maiores de 40.000 euros destinada a apoiar os Cursos de verán de lingua e cultura galegas que organiza en colaboración coa USC e a Secretaría Xeral de Política Lingüística e mais os traballos de investigación en toponimia.

A Consellería dirixida por Vázquez Abad dálle continuidade á colaboración da Administración autonómica coa RAG colaborando con ela no financiamento de parte dos seus gastos correntes e de funcionamento, así como á realización de investimentos e outros gastos de capital derivados da realización dos traballos que, no marco da súa programación anual, leve a cambo en materia de normalización do idioma galego, en consonancia co establecido nos estatutos da institución.

Proxectos en desenvolvemento da RAG

A disposición adicional da Lei 3/1983, do 15 de xuño, de normalización lingüística establece que nas cuestións relativas á normativa, actualización e uso correcto da lingua galega, estimarase como criterio de autoridade o establecido pola RAG. Esta institución ten a obriga de levar a cabo un traballo continuado de actualización e modernización da nosa lingua para satisfacer as novas necesidades expresivas que se derivan da vida moderna e ofrecer directrices para o uso correcto do galego.

A programación da RAG engloba diversos proxectos de formación filolóxica e terminoloxía que teñen por finalidade actualizar o coñecemento lingüístico de acordo coas necesidades da sociedade actual. Desde o ano 1993 o dicionario bilingüe castelán-galego da RAG, a gramática galega e a creación do Equipo de Traballo Sociolingüístico e o Servizo de Terminoloxía Científico -Técnica en Lingua Galega (Termigal).

A Real Academia Galega consta de tres seccións que, á súa vez, se conforma en grupos de traballo ou seminarios, en función das características e da operatividade da devandita sección: a sección de Historia desenvolve un importante traballo arredor da investigación dos diferentes aspectos vencellados á historia da institución e á de Galicia; a sección de Literatura encárgase da recuperación de textos literarios galegos, do estudo da nosa literatura e da organización de eventos relacionados con ela; a sección de Lingua ten en marcha os seminarios de Gramática, de Lexicografía, de Onomástica, de Sociolingüística e de Terminoloxía Galega.

O Seminario de Gramática, este encárgase da elaboración de estudos gramaticais sobre a lingua galega e, de maneira especial neste momento, da redacción da Gramática da Real Academia Galega. Pola súa banda, o Seminario de Lexicografía encárgase da elaboración dos distintos dicionarios, de redactar os informes solicitados á RAG sobre todo tipo de cuestións relacionadas co léxico e de manter actualizada na páxina web as cuestións relacionadas co léxico e da coorganización dos Cursos de verán de lingua e cultura galegas para estranxeiros e españois de fóra de Galicia.

O Seminario de Onomástica encárgase da recompilación de datos do ámbito dos nomes propios, da súa investigación e da elaboración de informes sobre toponimia e antroponimia, mentres que no Seminario de Sociolingüística se desenvolven estudos de temática diversa, como a elaboración de enquisas, a análise de actitudes lingüísticas ou a medición das competencias lingüísticas.

Pola súa banda, o Seminario de Terminoloxía Galega (TERMIGAL), no que tamén participa a Xunta de Galicia e que foi creado no ano 1996 coa finalidade de darlle cumprimento á obriga de actualización do léxico, traballa arestora na elaboración do Dicionario de márketing, na actualización da base de datos de botánica e no Dicionario das TIC.