Preséntase en Sarria (Lugo) a exposición-homenaxe a Manuel Rodríguez López

O xoves 6 de marzo presentouse na Casa da Cultura de Sarria a
exposición “MANUEL RODRÍGUEZ LOPEZ, emigrante galego-poeta obreiro” que, promovida por Galicia Digital e a familia do escritor, conta co apoio do
Concello de Paradela, Concello de Lugo, Deputación Provincial
(Vicepresidencia 1ª) e a Secretaría Xeral de Política Lingüística da Xunta
de Galicia. E, neste caso, para a súa exposición en Sarria, coa
colaboración do concello sarriano.

A mostra, aberta o pasado 28 de febreiro, pode verse na Casa da Cultura
de Sarria ata o próximo 15 de marzo, pasando a continuación á Casa da
Cultura de Portomarín.

Neste acto de presentación en Sarria participaron o Secretario Xeral de
Política Lingüística, Valentín García; os alcaldes de Paradela (José Manuel
Mato) e Sarria (José Antonio García López), a viuva do escritor (Irene
López) e Antonio Giz, director de Galicia Digital.

A Mostra está formada por 8 paneis dobles nos que se expoñen de xeito moi gráfico anacos da vida e obra do escritor de Paradela, fillo predilecto do seu concello natal. Chega esta exposición itinerante a Sarria, capital da comarca á que pertence Paradela, despois de poder contemplarse en Paradela, Lugo (Museo provincial) e Begonte (Casa da Cultura). Inmediatamente despois trasladarase a Portomarín (2ª quincena de marzo), para logo ser exposta en Santiago, e en Cataluña, terra na que o escritor escribíu a maior parte da súa obra.