Xunta e editoriais valoran medidas de reforzo da proxección do libro galego

A Consellería de Cultura, Educación e Ordenación Universitaria valora coas editoriais galegas novas actuacións que contribúan a reforzar a proxección do sector a través das principais feiras internacionais do libro. Con este fin, o secretario xeral de Cultura, Anxo Lorenzo, mantivo unha reunión con representantes da maioría de editoriais que participaron o pasado mes de decembro na Feira Internacional do Libro (FIL) de Guadalaxara, en México, onde Galicia contou cun stand propio.

Ademais de facer balance da actividade realizada polos profesionais galegos no evento máis importante do mundo, o encontro tivo como obxectivo valorar novos mecanismos que contribúan a impulsar a difusión da produción editorial galega no exterior e a favorecer o intercambio comercial a través destas feiras internacionais.

Para avanzar nesta dirección, apostouse por establecer mecanismos que garantan a coordinación permanente entre a Administración autonómica e as empresas interesadas en participar nestes eventos culturais, así como por intensificar a planificación da actividade a desenvolver nas feiras. A elaboración de material promocional da produción editorial e a incorporación de produtos dixitais á exposición pública do stand foron outras das propostas que se abordaron no marco do encontro, que tivo lugar hoxe na Biblioteca e Arquivo de Galicia da Cidade da Cultura.

Representantes, entre outros, de OQO Editora, Editorial Galaxia, Edicións Positivas, Linteo Ediciones, Nova Galicia Edicións, McSports e Ideas Propias Editorial asistiron á reunión, na que tamén participaron a Asociación Galega de Editores, as dúas escritoras galegas convidadas á FIL de Guadalaxara, Fina Casalderrey e Elena Gallego, e a subdirectora xeral de Bibliotecas, Cristina Rubal.

En 2013, a Consellería apoiou a presenza das editoriais galegas nas feiras de Boloña, o pasado mes de marzo; de Bos Aires, en abril; de Frankfurt, en outubro; e de Guadalaxara, en decembro. Coa presenza de Galicia nestes eventos culturais, o obxectivo da Consellería de Cultura e Educación é impulsar a competitividade da literatura galega no mercado internacional, de apoiar os creadores e de fomentar a innovación á hora de editar, distribuír e promover o libro e a literatura galega no exterior.