Homenaxe á xornalista e escritora galega Sofía Casanova como gran europea

O presidente do Goberno galego, Alberto Núñez Feijóo, referiuse durante o acto de homenaxe á escritora e xornalista, a Sofía Casanova como unha “gran europea” que tivo a virtude de facerse cidadá adoptiva dos lugares que percorreu. “En medio do marasmo do seu tempo, intuíu a idea de Europa. Esta galega e polaca leva en si mesma o xerme da Europa que hoxe coñecemos”, aseverou.

Ao longo da súa intervención, Feijóo subliñou que unha feliz casualidade fai que converxan nela dous compoñentes do europeísmo. “En primeiro lugar -dixo-, unha Galicia onde culmina o Camiño que dá forma á idea europea. Na ida cara á Compostela, camiñan homes e mulleres de variada procedencia que necesitan un horizonte novo. Á volta, todos eles se transformaron nun ser novo: o europeo. Cada un sementa ao seu regreso unha semente de europeísmo que finalmente haberá de converterse na Europa unida. Despois, a Polonia á que a sorte depara servir de cruce de camiños, de lugar de encontro non sempre pacífico de pobos e culturas. Polonia e Galicia, Galicia e Polonia, teñen en común o ter visto en Europa o Camiño definitivo para a súa realización. Ser polaco, ao igual que ser galego, significa ser europeo. Sen Europa, tanto o carácter polaco como o galego, están incompletos”.

Así mesmo, Feijóo lembrou que Sofía Casanova foi tamén pioneira na reivindicación feminina, gardando un indubidable parentesco con figuras como Rosalía de Castro, Emilia Pardo Bazán, Concepción Arenal ou María Casares, entre outras.

O titular da Xunta concluíu recoñecendo que, a pesar da súa traxectoria, tardouse en facerse xustiza con Sofía Casanova. “Non era fácil adscribila. Non era sinxelo etiquetala, ou convertela en icono dun ou doutro bando. Foi libre. E hai tempos en que a liberdade paga un custoso tributo en forma de esquecemento”, salientou.