Sol de medianoche, novo poemario da escritora e académica Luz Pozo Garza

A Consellería de Cultura, Educación e Ordenación Universitaria, representada polo secretario xeral de Cultura, Anxo Lorenzo, participou na presentación do novo poemario de Luz Pozo Garza. "Sol de medianoche" é o título baixo o que se presenta a obra máis recente da académica da lingua galega, publicada este ano polo selo ourensán Eurisaces.

A Sala Ámbito Cultural de El Corte Inglés da Coruña acolleu a presentación da obra, na que a autora estivo acompañada por Ramón Pernas, director de Ámbito Cultural; polo coordinador de Eurisaces, Javier González; e mais polo escritor Ramón Loureiro. Nesta nova obra, Luz Pozo afonda no sufrimento a través de 64 poemas estruturados en cinco partes, que teñen como “centro e inspiración” a súa neta Natalia, falecida en 2011.

Traxectoria literaria

Luz Pozo Garza (Ribadeo, 1922) iniciou o seu labor editorial en ‘Nordés’, revista de poesía e crítica da que foi directora. Forma parte da Real Academia Galega como membro numerario desde 1996 e tamén é membro do Centro PEN de Galicia. ‘Anfora’ (1949), ‘O paxaro na boca’ (1952), ‘Concerto de outono’ (1981), ‘Códice Calixtino’ (1986) e ‘Medea en Corintio’ son algúns dos títulos que conforman a súa obra poética.

Os premios Tomás Barros de ensaio, González Garcés e Letras de Bretaña, así como o da Crítica Española e a Medalla Castelao son algunhas das distincións coas que foi recoñecida a súa traxectoria literaria.