Inaugúrase a exposición sobre o poeta paradelense Manuel Rodríguez López

O delegado de Cultura e Turismo da Deputación de Lugo, o nacionalista Mario Outeiro inaugurou a exposición sobre o a figura do poeta paradelense Manuel Rodríguez López: Emigrante Galego – Poeta Obreiro, que está aberta ao público na sala multiusos do Museo Provincial de Lugo ata o vindeiro 7 de novembro. No acto tamén participaron Valentín García, secretario xeral de Política Lingüística; Xosé Manuel Mato, alcalde de Paradela; Santiago Rodríguez, fillo do homenaxeado, no nome da familia; e Antonio Giz, director de Galicia Digital.

A mostra está formada por 16 paneis informativos sobre diversos aspectos relativos á vida e obra deste creador galego, do que a maior parte da súa obra veu a luz na emigración catalana; e forma parte do proxecto de difusión da vida e obra do escritor paradelense Manuel Rodríguez López, impulsado por Galicia Digital, e rematará en próximos anos coa edición da obra completa e unha produción audiovisual.

Imaxes sobre a súa vida, publicacións, entre as que se atopan libros de poesía, libros inéditos e colaboracións en libros colectivos, prensa e revistas; premios, condecoracións e homenaxes recibidas; a súa presenza na prensa; correspondencia; poemas musicados; opinións sobre o poeta ou a súa figura de emigrante son aspectos que aparecen recollidos nesta exposición.

Durante a súa intervención, Mario Outeiro explicou que “esta exposición representa unha boa oportunidade para que os lucenses poidamos coñecer máis de cerca a obra do noso veciño Manuel Rodríguez López, fillo predilecto de Paradela, home bo e xeneroso; o poeta obreiro máis importante da Galiza da segunda metade do século XX, así como unha homenaxe á súa figura”.

Nota de prensa remitida por X.X.:

Esta exposición, que desde o pasado agosto puido verse en Paradela, forma parte do proxecto de difusión da vida
e obra do escritor paradelense Manuel Rodríguez López, impulsado por Galicia Digital, do que o primeiro paso foi a creación da web
www.manuelrodriguezlopez.com, unha das máis completas que teña un escritor galego, e rematará en próximos anos coa edición da obra completa e unha producción audiovisual.

A mostra está formada por 16 paneis informativos sobre diversos aspectos relativos á vida e obra deste creador galego, do que a maior parte da súa obra veu a luz na emigración catalana. E poderá ser visitada de luns a venres de 9 a 21 h., os sábados de 10,30 a 14 e de 16,30 a 20, e os domingos de 11 a 14h.

Na inauguración participaron o Secretario Xeral de Política Lingüística, Valentín García; o Deputado de Cultura, Mario Outeiro; o Alcalde de Paradela, Xosé Manuel Mato; ademais de Santiago Rodríguez, fillo do homenaxeado, no nome da familia e Antonio Giz, Director de Galicia Digital.
Na sesión inaugural lembrouse a figura dun magnífico escritor con moi importante vencello coa cidade de Lugo, onde residiu os últimos anos da súa vida, e para o que se ten solicitado a dedicación do “Día das Letras Galegas”.

Fotografías: Carlos Rodríguez Arias.