A Xunta abre cos partidos políticos un proceso de diálogo arredor da lingua

A Consellería de Cultura, Educación e Ordenación Universitaria dirixiuse por escrito a todos os grupos con representación no Parlamento de Galicia convidándoos a iniciar un proceso de diálogo para a vertebración dunha política común arredor da lingua galega.

O propio secretario xeral de Política Lingüística, Valentín García Gómez, con motivo da recente aprobación da proposición non de lei sobre as actuacións que debe levar a cabo o Goberno galego en materia de política lingüística, remitiulles hoxe unha carta aos voceiros de lingua de todos os grupos políticos con representación na Cámara manifestándolles o interese do Executivo galego en reunirse a vindeira semana para escoitar as súas propostas.

Esta iniciativa é una das medidas que a Xunta de Galicia está levando a cabo co obxectivo de promover o diálogo con todos os axentes implicados na promoción, difusión e consolidación do uso da lingua galega. A Xunta de Galicia manifesta deste xeito a súa vontade de achegar posturas a prol de acadar o máximo consenso posible para poder así garantir a promoción do uso do idioma propio fomentando, en todo momento, a convivencia e o entendemento da nosa riqueza lingüística.