Achado o testamento do mariscal Pardo de Cela, figura da historia galega

O conselleiro de Cultura, Educación e Ordenación Universitaria, Xesús Vázquez Abad, participou co investigador protagonista da descuberta, Eduardo Pardo de Guevara y Valdés –director do Instituto “Padre Sarmiento” e especialista na historia social da nobreza baixomedieval galega–, na rolda de prensa de presentación do testamento do Mariscal Pardo de Cela.

O acto realizouse na sede compostelá do Instituto de Estudios Galegos “Padre Sarmiento”, centro de titularidade compartida CSIC-Xunta de Galicia, do que o conselleiro sinalou “o infatigable labor que historicamente realiza a favor do mantemento da memoria de Galicia, da xestión do noso patrimonio e da difusión da nosa cultura.”

Pardo de Cela, mito e realidade.- Na rolda de prensa, o director do IEGPS contextualizou a vida e os feitos do Mariscal Pardo de Cela, baseándose na documentación localizada durante as últimas décadas, e deu conta polo miúdo do importante achado, avanzando algún dos aspectos máis significativos contidos no documento testamentario.

“A vida do Mariscal Pardo de Cela e o seu tráxico fin, sobre todo –dixo Pardo de Guevara–, están desdebuxadas polo peso da atractiva lenda forxada ao longo dos séculos. Isto unido á á escaseza de documentos, explica as notables dificultades para separar o mito da realidade, así como os intensos debates que suscitan as causas e circunstancias que rodearon o triste final desta célebre figura histórica.”

A continuación, Vázquez Abad trasladoulle os seus parabéns ao profesor de investigación do CSIC, Pardo de Guevara, “polo achado, que ofrece nova luz sobre unha personaxe esencial da Historia de Galicia, rescatando ademais do esquecemento unha importante peza documental e aumentando o caudal de certezas sobre o que construír o coñecemento histórico da figura de Pedro Pardo de Cela.”

“O Mariscal non é exclusivamente unha personaxe histórica; pero a dimensión histórica de Pardo de Cela –afirmou o conselleiro– é algo que resulta preciso estudar, discernindo os feitos, o contexto, os motivos e acontecementos desta gran figura da historia de nós, do mito e da personaxe literaria abordada por multitude de autores, algúns tan sinalados como Ramón Cabanillas ou Emilia Pardo Bazán.”

“Hoxe, coa presentación deste testamento, damos un paso máis para a mellor comprensión da personalidade do Mariscal”, concluíu o conselleiro.