Agapi debate sobre o valor do audiovisual galego na adaptación ao dixital

O secretario xeral de Cultura, Anxo Lorenzo, incidiu no papel das tecnoloxías para ampliar o abano de posibilidades dos produtores e creadores do ámbito audiovisual. Segundo precisou, “as tecnoloxías abren novas portas para acceder a públicos diversificados que, ao mesmo tempo, presentan novas formas de consumo ás que as empresas do sector deben saber atender e albiscar nos seus movementos”.

Ao fío disto, afirmou que “calquera sector cultural debe entender o contorno tecnolóxico como un reto e unha oportunidade para impulsar novos formatos, para favorecer novas formas de consumo e para chegar a novos públicos”.

Así o asegurou durante a inauguración da xornada A obra audiovisual. Propiedade intelectual e contexto dixital, promovida pola Asociación Galega de Produtoras Independentes (Agapi), que tivo lugar esta mañá na Facultade de Ciencias da Comunicación da Universidade de Santiago de Compostela (USC).

Unha cultura responsable e sostible do consumo

Anxo Lorenzo afirmou que “a dimensión dixital da creatividade obriga a unha reflexión e a unha capacidade de responder aos novos contornos de traballo e de difusión”. Neste sentido felicitou a Agapi, entidade que congrega unha boa boa representación das empresas audiovisuais, “por abordar este debate da propiedade intelectual no audiovisual, as posibilidades realistas de negocio e as ideas para construír unha cultura responsable e sostible do consumo a través de internet”. Finalmente, concluíu apuntando a necesidade de acadar un equilibrio entre contorno dixital e propiedade intelectual.

O secretario xeral de Cultura estivo acompañado no acto pola presidenta de Agapi, Dolores Ben, e polo secretario académico da Facultade de Ciencias da Comunicación da USC, Fernando Redondo.