O Consorcio Audiovisual de Galicia participa por primeira vez en calidade de novo membro no congreso de Cine-Regio organizado na cidade italiana de Lecce

Esta asociación, formada por membros de distintas entidades rexionais europeas, conta co apoio do programa INTERREG IIIC. O principal obxectivo de Cine-Regio é establecer relacións e intercambio de experiencias entre os membros e coordinar os distintos sistemas de axudas ao audiovisual que hai nas rexións para promocionar o desenvolvemento audiovisual en Europa. Durante o congreso presentouse a páxina web da asociación, www.cine-regio.org, que informará sobre as particularidades dos distintos membros da asociación e recollerá as publicacións habituais de Cine-Regio en forma de newsletter, así como os actos e eventos que se organizan dende a entidade. Neste espazo na rede colgarase a base de datos, con información de axudas de fondos públicos rexionais, que se creou grazas ao acordo de Cine-Regio co Observatorio Europeo do Audiovisual para traballar conxuntamente na recompilación e actualización dos contidos. Un encontro interesante foi o que tivo lugar, en forma de grupo de traballo, entre produtores e institucións para estudar, dende os dous puntos de vista, os problemas que se atopan á hora de cumprir as condicións de axudas de cada rexión para sacar adiante un proxecto en coprodución. Intentouse deseñar posibles estratexias que facilitasen acordos entre rexións membros de Cine-Regio, como a de crear un fondo de axudas ao desenvolvemento de proxectos, idea que tivo boa acollida por ambas partes, ou a intención de habilitar un foro de proxectos na web da asociación para buscar coprodución. Os membros de Cine Regio presentes no Congreso foron os 5 fundadores, Film Founds Wien (Austria), Rótterdam Film Found (Holanda), Wallimage (Bélxica), MFG Baden Wurttenberg (Alemaña), Provincia de Lecce (Italia) e os novos membros da asociación, sendo España o país con máis rexións representadas: Consorcio Audiovisual de Galicia, Institut Català de les Indústries Culturals, IVAC- La Filmoteca, Conseil Regional Provence Alpes cote D’azur (Francia), Film i Väst (Suecia), Screen South (Gran Bretaña), Poem (Finlandia) e The Westdanish Film Foundation (Dinamarca).