A UNED Sénior iniciou o seu curso en Guitiriz con 150 alumnos

Durante a inauguración a directora da UNED Sénior na Coruña, Susana Blanco asegurou que «a UNED Sénior está cada vez máis consolidada». Blanco recordou que a UNED acaba de firmar un convenio coa Xunta de Galicia para cofinanciar proxectos.

Pola súa banda, a secretaria xeral de Familia e Benestar, Susana López Abella, destacou a importancia do envellecemento activo e de desenvolver actividades para a promoción da autonomía dos maiores.

Por iso, López Abella recordou que a Consellería de Traballo e Benestar, xunto coa UNED Sénior, seguirá a manter “unha estreita colaboración” para consolidar esta iniciativa, xa que resaltou que “constitúe unha oferta de estudos importante para aquelas persoas que demandan un novo tipo de formación actualizada e axeitada ás súas inquedanzas formativas e intereses culturais”.

Por último, a responsable da área autonómica sinalou que o departamento autonómico destina anualmente 25.000 euros para colaborar co desenvolvemento das actividades que leva a cabo a UNED Sénior de Galicia.

Matrícula

Dos aproximadamente 150 inscritos na UNED, uns 90 alumnos corresponden co centro de Momán, Xestoso e Cambás. En concreto, na parroquia xermadina de Momán, hai 50 alumnos, entre eles o máis veterano de todos, Raúl Gómez, de 87 anos.

No municipio de Guitiriz hai en torno a 30 matriculados. Porén, o prazo para inscribirse permanecerá aberto ata o 20 de outubro.

A UNED ten fixada unha taxa de 50 euros por materia, pero segundo explicou o coordinador da iniciativa, Luís Ángel Rodríguez Patiño, “diferentes axudas permiten que en Momán se paguen só 20 euros pola primeira materia, 15 pola segunda e dez pola terceira”. En Guitiriz o custe de cada materia é de 15 euros.

A escola de Momán será un ano máis a sede de varias clases. Así, nestas instalacións impártense os luns pola tarde Música, Solfeo e Canto. Os xoves teñen lugar as clases de Problemas Médicos Actuais. Outras materias son Introdución ao Patrimonio Histórico, cunha xornada de viaxes e visitas culturais os martes; e Informática.

Por outra parte, o alumnado de Guitiriz asistirá a catro materias durante este primeiro cuadrimestre: Informática, Tertulia Literaria, Música e Ximnasia