Saliéntase a obra de Rosalía de Castro como parte indispensable do patrimonio

O director xeral do Libro, Bibliotecas e Arquivos, Francisco López, asistiu na Facultade de Filoloxía da Universidade de Santiago á presentación da nova entrega da ‘Revista de Estudos Rosalianos’ realizada polo Centro de Estudos Rosalianos e a Fundación Rosalía de Castro. Francisco López gabou a figura da escritora de Padrón e asegurou “que a obra de Rosalía constitúe unha parte importantísima do patrimonio que podemos compartir”.

Segundo informou o director xeral do Libro, esta nova entrega da revista serve para “situar na realidade do presente o legado da autora fundacional da literatura galega contemporánea”. Para Francisco López, “está aberta a unhas dimensións totalmente acordes coa importancia daquela muller que dinamitou a lírica decimonónica e a capacidade de transmisión poética cunha obra diría eu que indómita, innegociable, no que se refire ao sometemento a etiquetas ou valores do pasado, e que adquire novos significados baixo o prisma de cada lectura”.

Respecto ás achegas que recibiu a publicación, o director xeral apuntou que “vemos nesta nova entrega unha relación de colaboradoras e colaboradores que nos fala xa dun nivel perceptivo e investigador de primeira liña” o que constitúe “un gran vínculo de unión, unha expresión ambiciosa da nosa identidade”.

Francisco López manifestou o compromiso da Xunta de Galicia con Rosalía e amosou o seu apoio a esta iniciativa “na que, dun xeito ou doutro, estamos involucradas todas as entidades e persoas con interese no recoñecemento de Galicia como potencia intelectual”.