A Cidade da Cultura adica o ciclo Galicia, ceo das letras ao escritor Torrente Ballester

A forza creativa, irónica e prolífica, do escritor ferrolán Gonzalo Torrente Ballester centra a sesión do ciclo literario “Galicia, ceo das letras”, que se desenvolve na Biblioteca de Galicia o sábado 28 de maio. A programación na Cidade da Cultura complétase ademais o domingo 29 co ciclo de teatro infantil “Titemá”, que presenta a peza “Babili Glub!”, un espectáculo de monicreques da compañía Galitoon para nenos a partir de 1 ano.

A actriz Charo López será unha das invitadas “estrela” do “Galicia, ceo das letras”, onde participará nunha lectura musicada de textos do Torrente. Charo López conta, entre as súas interpretacións máis recoñecidas, co seu papel en “Los Gozos y las sombras”, a adaptación á televisión da novela do ferrolán. Xunto a actriz estará os escritores Alfredo Conde, Premio Nacional de Literatura e Premio Nadal, e Luis Iglesias Feijóo, catedrático de Literatura Española e prestixioso hispanista.

A sesión estará presentada por Álvaro Torrente, presidente da Fundación Torrente Ballester e fillo do escritor galego. Nela proxectarase o documental “GTBxGTB”, producido Acción Cultural Española (AC/E), entidade que “amadriña” a sesión. O documental, realizado con motivo das celebración dos cen anos do nacemento do escritor, foi co-dirixido por Daniel Suberviola e por Luis Felipe Torrente, fillo tamén do escritor.

O encargado de achegar a vida de Torrente ao público será o escritor Jesús Ferrero, con galardóns como o Premio Internacional Plaza y Janés, Anagrama ou Azorín, ademais de incursións no mundo do cine, onde traballou con Pedro Almodóvar no guión de “Matador”.

Teatro infantil

O domingo será o turno do teatro infantil, co ciclo “Titemá”. A compañía Galitoon presentará “Babili Glub!”, con dous pases: ás 12,00 e ás 17,00 horas no Auditorio da Biblioteca de Galicia. Este espectáculo, gratuíto e pensado para rapaces a partir de 1 ano de idade, baséase no uso de monicreques luminosos que flotan no aire. A través deles, Galitoon achegará aos rapaces a idea de tolerancia, contando a historia dun peixiño que se enfronta ao mundo subacuático onde todas as criaturas só saben dicir a palabra “Non!”.