Texturas, Santiago 2004 mostra o oficio dos encadernadores a través de traballos artísticos contemporáneos

Nesta mostra, que permanece aberta ata o 29 de novembro, AGEA expón arredor de 22 pezas de 11 artistas encadernadores co obxectivo de difundir o oficio da encadernación que, segundo os organizadores, require de tempo, esforzo, un gran dominio da técnica e a capacidade de relacionar o interior do libro co que será o seu aspecto exterior. Hai que ler o texto e plasmar o que suxire nun deseño que adecúe o continente co contido, explican dende AGEA.
A característica común das obras expostas é a súa encadernación contemporánea, que se distingue da tradicional por utilizar materiais novidosos ou pouco habituais, e porque o seu autor goza dunha maior liberdade creativa. Así, mentres a encadernación clásica adoita reducirse a unha impresión en dourado sobre pel, entre os libros que estes días se poderán contemplar na Casa Jimena e Elisa Fernández de la Vega hai exemplares de gran beleza estética realizados en pel combinada con madeira, oso, gres, papel xapón... que as converte en pezas únicas dun alto valor artístico.