A Cidade da Cultura estrea o ciclo de teatro infantil Titemá, de Galitoon

A Cidade da Cultura de Galicia estrea o domingo 22 de maio o ciclo de teatro infantil Titemá. Organizado pola compañía galega Galitoon, os espectáculos combinan o uso de muppets clásicos, do tipo dos que aparecen en programas tan populares como “Barrio Sésamo” ou en producións como o “O Cristal Oscuro”, con técnicas máis anovadoras, como monicreques luminosos, creando unha plasticidade que atrapa a atención dos pequenos.

As historias de Titemá familiarizarán aos rapaces co mundo do jazz, da pintura ou da linguaxe, ao mesmo tempo que difunden valores como a tolerancia, a creatividade ou o achegamento da cultura galega aos mais novos. Os espectáculos terán lugar no Auditorio da Biblioteca de Galicia os domingos e haberá dous pases, ás 12 horas e ás 17 horas. Todos serán gratuítos.

O ciclo arrinca co “Botazz, o swing do jazz” (22 de maio), pensado para un público a partir dos tres anos. Inspirándose na estética dos debuxos animados da década dos cincuenta e dos sesenta, como “Tom e Jerry”, “Snoopy” ou “Betty Boop”, os nenos coñecerán ao mundo do jazz da man do can Botazz.

Despois será a quenda de “Babiliglub” (29 de maio), un espectáculo de monicreques luminosos que flotan na escuridade para nenos a partir dun ano. Trátase dunha historia que xira en torno a aceptación da diferenza, na que un peixe que só sabe pronunciar a palabra “Miau!” sofre a intolerancia de todos os habitantes do mar que só saben dicir “Non!”.

“Os limóns, chiquitos pero matóns” (5 de xuño) levará aos pequenos ao universo de Luís Seoane. Este peza teatral, que conta a historia de tres limóns emperrados en facerse mariñeiros, utiliza os cadros do xenial pintor galego como viñetas para esta historia infantil. O ciclo rematará ca historia de “Rosalía, a pulga que escribía” (12 de xuño), espectáculo que emprega a técnica dos monicreques sobre mesa e que vai dirixido a rapaces a partir dos dous anos.