Esgotadas as entradas para o concerto de Barenboim no ciclo Galicia Classics

As entradas para o concerto de Daniel Barenboim, incluído na programación do ciclo Galicia Classics, que se celebrarán no Auditorio de Galicia de Santiago de Compostela o 8 de xullo, xa están esgotadas. Esta actuación, incluída no Ano da Musica 2011, será o único concerto que Daniel Barenboim, o máis respectado director de orquestra do nosos tempo, ofrecerá en Galicia xunto a Staatskapelle Berlin, formación da que é titular.

Daniel Barenboim, que con esta actuación inaugurará esta nova xira española, dirixirá no Auditorio compostelán as sinfonías números 1 e 2 de Anton Bruckner, consideradas "catedrais do sinfonismo", nun concerto que servirá ademais para conmemorar os 800 anos da Catedral de Santiago. Daniel Barenboim, premio Príncipe de Asturias das Artes, pasa por ser o mellor director de hoxe. Combina a dirección musical da Scala de Milán coa titularidade da Staastkapelle Berlin, un dos conxuntos máis antigos e prestixiosos de Europa.

Doutra banda, xa poden adquirirse as localidades para outros dous destacados concertos que este ano ofrece a Galicia Classics. O próximo 4 de xuño, no Auditorio de Galicia, a mezzo Elina Garanca, a Carmen oficial de Metropolitan de Nova York, ofrecerá un concerto coa Real Filharmonía de Galicia no que interpretará unha selección de arias de óperas e romanzas de zarzuelas. Asemade, o 28 de maio no Teatro Colón da Coruña, o tenor Gregory Kunde regresa ao festival no que ano pasado logrou un gran triunfo persoal coa estrea en España de "Guillaume Tell" de Rossini. Kunde. Gregory Kunde ofrecerá un programa de arias de óperas de Verdi, Rossini e Gounod xunto a cancións de compositores norteamericanos.

O ciclo Galicia Classics recolle a estela do Xacobeo Classics en canto ao esquema da súa programación, e nace co obxectivo de ofertar concertos de primeira calidade para complementar as programacións musicais que xa existen en Galicia, aportando actuacións de primeiro nivel internacional, sen esquecer a música de autores galegos. Entre os meses de febreiro e decembro programáronse preto dunha trintena concertos de música clásica nas sete cidades galegas.