Recepción á Asociación Galega de Empresas Musicais con motivo do Ano da Música

O presidente da Xunta de Galicia, Alberto Núñez Feijóo, recibiu á directiva da Asociación Galega de Empresas Musicais (AGEM), que aglutina ás principais firmas de contratación, produción e management de artistas, cos que profundou nas principais liñas de colaboración co sector, así como cara ao desenvolvemento dos distintos actos de promoción que terán lugar este ano no ámbito musical.

O conselleiro de Cultura e Turismo, Roberto Varela Fariña, e o director da Axencia Galega das Industrias Culturais (Agadic), Juan Carlos F. Fasero, participaron así mesmo nesta reunión, na que a AGEM agradeceu a Feijóo a declaración de 2011 como o Ano da Música de Galicia, a través da que a Xunta de Galicia revalida o seu compromiso cun sector que está a confirmar o seu liderado. Así se desprende, por exemplo, do estudo As cifras da industria cultural galega, presentado recentemente pola Agadic, segundo o que o sector musical vén consolidando a súa emerxencia nos últimos anos cun volume de negocio total próximo aos 100 millóns de euros e un destacado nivel de xeración de emprego, tanto directa como indirectamente.

Os representantes de AGEM agardan, pois, que a celebración deste evento supoña un impulso definitivo cara á consolidación e crecemento do sector da música en Galicia, obxectivo no que veñen traballando en estreita colaboración coa Consellería de Cultura e Turismo, a través da Agadic.

A celebración do Ano da Música de Galicia supón, ademais, o recoñecemento institucional do “carácter estratéxico e prioritario deste sector como vehículo para a promoción e divulgación da cultura, historia e da lingua de Galicia”, segundo se recolle na declaración aprobada a primeiros de xaneiro polo Consello da Xunta. Así, as institucións públicas galegas, os centros de ensino, as asociacións e as federacións culturais dependentes da Xunta de Galicia contribuirán con parte da súa actividade a este evento, incidindo tanto no grande arraigo que, de xeito histórico, ten a música en Galicia como no feito de que os nosos músicos sexan auténticos embaixadores da nosa cultura fóra das nosas fronteiras.