Cultura e Gálix establecen liñas de colaboración

O director xeral do Libro, Bibliotecas e Arquivos, Francisco López, reuniuse coa nova directiva da Asociación Galega do Libro Infantil e Xuvenil (GÁLIX) para tratar as liñas de colaboración entre ambas partes de cara a este novo exercicio. Francisco López presentou algunhas das iniciativas que a súa dirección xeral porá en marcha a o longo deste ano 2011 co obxectivo de potenciar a literatura infantil e xuvenil tanto no mercado nacional e como no intencional.

Entre os temas que se trataron nesta xuntanza destacan a presenza de Galicia na ‘Feira Internacional do Libro Infantil e Xuvenil de Boloña’, que se celebrará entre o 28 e o 31 de marzo, e onde está previsto presentar a edición do Catálogo do libro infantil e xuvenil de Galicia correspondente a 2011. Asemade, acordouse por en marcha unha serie de iniciativas dirixidas a apoiar a imaxe da literatura nas primeiras etapas da vida das persoas, na que Galicia conta xa cun ben gañado prestixio internacional.

Doutra banda, afondouse na idea de designar anualmente un socio de honra de GÁLIX, que se escollerá entre autores relevantes no plano mundial vencellados á creación literaria infantil e xuvenil. Para este ano, trabállase coa idea de designar un autor galego de gran proxección e obra ben consolidada. O artista escollido, ao que se lle dedicará unha publicación de homenaxe, farase público antes do 2 de abril, Día Internacional do Libro Infantil e Xuvenil.