Martín Azúa, premio Mellor Deseñador 2010, e artesáns galegos presentan os espazos On/Off da Cidade da Cultura de Galicia a estudantes de Deseño de Interiores

Un centenar de estudantes das escolas de Arte e Superior de Deseño de Lugo, Ourense e A Coruña participaron na Cidade da Cultura de Galicia nun encontro co deseñador Martín Azúa, premio AD “Mellor Deseñador 2010” e un dos poucos artistas nacionais con obra fixa no MoMA de Nova York. A esta xornada asistiron tamén algúns dos artesáns galegos máis creativos neste intre, como Idoia Cuesta, Arturo Álvarez ou a directora xerente da Fundación Centro Galego da Artesanía e do Deseño, Elena Fabeiro.

Os alumnos visitaron os novos espazos ON/OFF, un proxecto que se ven de rematar e que foi elaborado por Martín Azúa, Idoia Cuesta, Arturo Álvarez e a firma Martínez Otero. O resultado son dúas salas complementarias sitas entre a Biblioteca e o Arquivo de Galicia, unha pensada como “zona de actividade” e a outra como unha “illa de descanso”. Este traballo é o resultado da fusión das técnicas tradicionais de artesanía galega e a creatividade de deseñadores e artesáns de vangarda.

O espazo ON está pensado como un lugar dinámico para relacionarse e conectarse, un espazo para repor enerxías, celebrar unha reunión informal, conectarse a internet. Contará cun punto de información para orientar aos visitantes sobre as actividades da Cidade da Cultura de Galicia. OFF é, pola contra, unha “illa de descanso”, unha zona para relaxarse e descansar. Sobre unha mesa haberá catálogos e libros relacionados coa Cidade da Cultura e un plasma mostrará unha programación en vídeo. Os asentos estarán fabricados con técnicas de cestaría tradicional galega.

Martín Azúa, Idoia Cuesta, Arturo Álvarez e Elena Fabeiro participaron nunha charla-coloquio cos estudantes titulada “Deseño e identidade local”. Azúa amosouse encantado de colaborar no proxecto que se está a levar a cabo no monte Gaiás. “Todos estamos escoitando falar da Cidade da Cultura e síntome moi contento de poder participar”, asegurou.

No nome dos artesáns galegos, Elena Fabeiro agradeceu a “liberdade creativa” que a Fundación Cidade da Cultura de Galicia lle deu para levar adiante este proxecto, que describiu como unha boa proba de cómo a artesanía pode asociarse e colaborar con outras disciplinas, como o deseño ou a arquitectura.