Eli Paperboy Reed actúa en Compostela o 17 de novembro

O ciclo Xacobeo Importa engade unha nova incorporación ao seu cartel de concertos para o Ano Santo. O 17 de novembro a Sala Capitol de Santiago acollerá a partir das 21.30 horas a actuación de Eli “Paperboy” Reed, na que o cantante presentará temas do que foi definido como o mellor soul do século XXI.

Eli “Paperboy” Reed, de só 25 anos e considerado un dos artistas revelación do 2008, e a súa banda The True Loves pisarán por primeira vez un escenario galego. Tralo seu magnífico disco Roll with you, que sacou ao mercado hai dous anos, fichou pola multinacional EMI e este ano presentou Come and get it. Asemade, a prensa internacional comparouno cos grandes, e medios como Rolling Stone, Mondo Sonoro, Rockdelux ou Ruta 66 foron unánimes ao elixir o directo de Reed como un dos mellores que pasou por España en 2008 e 2009.

Tralo verán, o ciclo Xacobeo Importa volve cunha apertada axenda para o que queda de 2010. Este venres, 1 de outubro, será a quenda de Interpol e xa no mes de novembro, os míticos The Zombies actuarán en Vigo e Alice Cooper chegará a Santiago para ofrecer un concerto que non deixará indiferente a ninguén. Por último, a banda Teenage Fanclub pechará o ciclo Xacobeo Importa cun concerto en Santiago o próximo 3 de decembro.

Xacobeo Importa é una iniciativa do Xacobeo 2010 e o Ciclo Importa que supón unha programación regular, que engloba a grupos e artistas do circuíto independente, que nunca visitaron Galicia, ou que pola súa traxectoria, estilo ou relevancia, merecen ser presentados ao público galego en actuacións únicas e formatos especiais.