Fonmiñá inaugura a mostra de carteis anunciadores da XXXII Semana de Cine

A sala de exposicións do Edificio Administrativo da Xunta de Galicia en Lugo acolle ata finais deste mes de setembro unha mostra de corenta carteis presentados ao certame convocado polo Grupo Cinematográfico Fonmiñá para elixir o cartel anunciador da XXXII Semana Internacional de Cine de Autor da capital lucense.

Deste xeito, a mostra que estes días acolle o edificio da Xunta de Galicia na capital lucense abre a programación da Semana de Cine, que se celebra entre o 26 de setembro e o 2 de outubro, e que incluirá, ademais da proxección de preto de corenta filmes de autor, diversas exposicións e a estrea dun documental e un ciclo de películas dedicado ao actor galego Enrique Muiño. A homenaxe ao intérprete complétase coa publicación dun libro que recolle a súa traxectoria vital e profesional.

O gañador do concurso, cuxa convocatoria se efectuou a través de Internet, é Martín Fores Sanz. O deseño do artista valenciano foi escollido entre sesenta propostas por un xurado formado por membros da asociación Fonmiñá e representantes das institucións patrocinadoras e colaboradoras, entre as que se atopan a Xunta de Galicia e o Plan Xacobeo.

A entrega de premios desenvolverase o vindeiro día 27 de setembro, coincidindo coa xornada inaugural da Semana Internacional de Cine de Autor, que este ano chega á súa trixésimo segunda edición. O gañador do certame recibirá 1.000 euros de premio, ademais dunha estatuíña de Sargadelos.

A presentación e apertura da mostra correu a cargo da xefa territorial de Presidencia, Marta Barreiro, e o presidente do Grupo Cinematográfico Fonmiñá, Xulio Xiz, e máis o director da Semana de Cine de Autor de Lugo, Manuel Curiel.

Fonmiñá:

O mércores, día 15 de setembro, inaugúrase na sala de exposicións da Xunta de Galicia en Lugo unha mostra de carteis presentados ó Certame convocado por Fonmiñá, para elixir o cartel anunciador da XXXII SEMANA INTERNACIONAL DE CINE DE AUTOR.

Dos sesenta carteis presentados, hanse expoñer corenta, seleccionados polo Xurado con este fin.

O valencián MARTÍN FORES SANZ é o gañador do Concurso convocado polo Grupo Fotocinematográfico Fonmiñá para elixir o cartel anunciador da XXXII Semana Internacional de cine de Autor de Lugo. O premio está dotado con 1.000€ e unha estatuíña de Sargadelos.

Ó Certame concorreron un total de sesenta carteis recibidos de Navarra, Tarragona, Madrid, León, Jaén, Cáceres, Lleida, Ourense, Sevilla, Zaragoza, Barcelona, Cuenca, Valencia e Lugo. Á selección final chegaron cinco deseños procedentes de Lleida, Zaragoza, Astorga, Ourense e Valencia, sendo elixido este último.

A convocatoria do certame efectuose exclusivamente por Internet, a través da plataforma www.galiciadigital.com e das páxinas www.semanadecine.delugo.info e www.fonmiña.es

O Xuirado estivo formado por representantes das institucións patrocinadoras e colaboradoras, e membros de Fonmiñá: Concello de Lugo (Nuria Mundiña, Concelleira de Cultura), Deputación Provincial-Vicepresidencia 1ª (Aurelia Balseiro, Directora do Museo Provincial), Xunta de Galicia e Xacobeo (X. Carlos Rodríguez Andina, Xefe Territorial de Cultura e Turismo), Universidade-Campus de Lugo (Paloma Lugilde), Caixa Galicia (Sinesio Díez), e por Fonmiñá, Carlos Rodríguez Arias (Vocal de video), Eduardo Rodríguez Ochoa (Vocal de Fotografía), Manuel Curiel (Director da Semana de Cine) e Xulio Xiz (Presidente do Grupo Fotocinematográfico).

Coa selección dos carteis presentados hase efectuar unha exposición, coincidindo coa celebración da Semana de Cine.

A entrega de premios terá lugar no decurso da xornada inaugural da XXXII Semana de Cine, o 27 de setembro

Fotografía: Carlos Rodríguez Arias