Homenaxe musical ao poeta Uxío Novoneyra a través do ciclo Interseccións

O Director Xeral de Promoción e Difusión da Cultura, Francisco López acompañado polo Delegado Territorial da Xunta en Ourense, Rogelio Martínez, presentou, en Ourense, xunto ao músico e compositor, Emilio Cao o ciclo de sete concertos Interseccións. A ollada de Novoneyra, que recolle algúns dos poemas do poeta de O Courel musicados por Emilio Cao.

Francisco López definiu ao espectáculo como unha “mestura de música e poesía” que “pretende achegar, a través da expresión artística musical, a voz de Novoneyra co obxectivo de sembrar a súa memoria neste ano adicado a súa figura”.

O Director Xeral de Cultura lembrou que Interseccións. A ollada de Novoneyra, é o resultado “dun proxecto discográfico inconcluso, para o que Emilio Cao e Novoneyra viaxaron xuntos a O Courel e mesmo chegaron a gravar parte do material, ata a morte do poeta”. Francisco López salientou a singularidade da participación nos concertos da coreógrafa e profesional do mundo da danza Branca Novoneyra, “filla do escritor e poeta como o seu pai”, que ven de presentar o seu primeiro poemario, Dentro do Labirinto.

Os concertos que achegarán a todos os públicos a voz de Uxío Novoneyra e a música de Emilio Cao, recollen poemas como “Amiga, Alba e Delgada; Quen na outra tarde, Caín as follas, que foron rectificados polo propio Novoneyra para a súa gravación”, como indicou o director xeral.

Interseccións. A ollada de Novoneyra bota a andar o venres 21 de maio no salón de actos da Biblioteca da Cidade de Ourense, ás 20:00 horas no que Francisco López cualificou como “un espectáculo público para os que desexen gozar da boa música, da boa danza e da mellor poesía”.

Cao-Novoneyra

O traballo está baseado na colaboración de Emilio Cao co propio Novoneyra nos derradeiros anos da súa vida e mestura a solvencia musical e a poesía dun dos grandes renovadores da literatura galega. No ciclo de concertos intervirá tamén Carmen Rey, cantante vinculada dende hai anos aos directos de Emilio Cao que puxo a súa voz en colaboracións con músicos da escena folk e do jazz como Xose Manuel Budiño. A intervención contará tamén coa presenza do pianista Manuel Gutierrez, compoñente do grupo Sumrra co que xa ten gravados catro traballos.

Os concertos itinerarán nun prazo de dez días, do 20 de maio ao 1 de xuño, polas cidades de A Coruña (Teatro Rosalía), Lugo (Círculo das Artes), Ourense (Biblioteca Nodal), Pontevedra (Auditorio Padre Amoedo), Vigo (Verbum Museo da Palabra), Ferrol (Fundación Torrente Ballester) e Santiago (San Domingos de Bonaval), en horarios comprendidos desde as 20.30 ás 22.00 horas.