A mostra 33 escritores vistos por Luis Seoane, conmemorativa do seu centenario, chega a Bos Aires

O director xeral de Promoción e Difusión da Cultura inaugurou a exposición 33 escritores vistos por Luís Seoane dentro dos actos galegos da Feira Internacional do Libro de Bos Aires. A mostra, organizada pola Xunta de Galicia, subsecretaría de Cultura do Ministerio de Cultura porteño e a Fundación Luís Seoane, supón para o Goberno Autonómico unha contribución ao recordo, ao estudo e ao recoñecemento da obra e o pensamento do gran artista e intelectual galego-arxentino que foi Luís Seoane, en conmemoración do cen aniversario do seu nacemento. A exposición do artista galego poderá visitarse ata o 16 de maio de martes a domingo con entrada gratuíta.

Para a Xunta de Galicia, esta mostra é unha pequena testemuña decisiva para achegarse ao universo intelectual e vital dun pintor de mirada cosmopolita como foi Luís Seoane. A exposición xoga coas inquedanzas literarias e artísticas que fan de Luís Seoane un dos galegos que máis se preocupou no seu século pola posta en valor do gran elenco das letras e artes universais, segundo un criterio propio construído en base a unha vida entregada ao intercambio cultural na que merece destacarse a relevancia das súas conexións con Arxentina e o ámbito iberoamericano.

Na obra de Seoane expóñense retratos de Kafka, Chesterton, Stevenson, Borges, Salinas, autores que pasaron polo trazo á vez libre e preciso deste artista que non só conviviu coa plástica, senón con todas as formas da palabra verbo da súas múltiples facetas como lector, escritor, crítico ou divulgador.

A exposición 33 escritores vistos por Luís Seoane, completa dúas xornadas de recoñecemento á vida e obra do escritor galego no centenario do seu nacemento, complementando a conferencia “Seoane entre dou mares”, que Ramón Villares expuxo onte na Feira Internacional do Libro de Bos Aires.

Rosalía de Castro

O director xeral de Promoción e Difusión da Cultura, Francisco López, inaugurou asemade na Feira Internacional do Libro de Bos Aires a Sección Galega Rosalía de Castro da Biblioteca Julio Cortázar, na conmemoración do cento vintecinco aniversario do pasamento da escritora de Padrón.

Á inauguración tamén asistiron o delegado da Xunta de Galicia en Bos Aires, Alejandro López Dobarro, o ministro de Cultura do Goberno da Cidade de Bos Aires, Hernán Lombardi, e a directora do Libro do Goberno da Cidade de Bos Aires, Alejandra Ramírez.