O CGAC acolle a segunda parte do curso Deseño para artesáns desde a creatividade

A Consellería de Economía e Industria, a través da Fundación Centro Galego da Artesanía e do Deseño, organiza para os días 9 e 10 de abril a segunda parte do curso “Deseño para artesáns: Ferramenta creativa, Ferramenta produtiva”. A actividade lectiva impartirase no CGAC, como continuación das xornadas desenvolvidas no MARCO de Vigo os pasados 12 e 13 de marzo, onde artesáns en activo participaron nun obradoiro de deseño de produto.

Os seminarios teñen unha duración total de 31 horas e á súa fronte estará Pere Durán, profesor de deseño gráfico, packaging y deseño interdisciplinar da Escuela Massana de Barcelona. Os asistentes recibirán formación sobre a socioloxía do uso e do mercado, a identidade e a imaxe gráfica de marca e a embalaxe e/ou packaging como estratexia de posicionamento no punto de venda.

O obxectivo da Consellería de Economía e Industria con estas xornadas, organizadas pola Fundación Centro Galego da Artesanía e do Deseño, é o de ofrecerlle a profesionais da artesanía aquelas ferramentas básicas de deseño.

Completando a actividade lectiva haberá unha conferencia aberta ao público. O venres día 9 de abril ás 19:00 horas no Auditorio do CGAC, o deseñador e editor Óscar Guayabero (www.guayabero.net) impartirá o relatorio titulado “Novos usos, novos públicos, novos obxectos”.