O Festival de Músicas Contemplativas trae a Compostela músicas do mundo

Durante a próxima Semana Santa diferentes igrexas de Santiago acollerán a quinta edición do Festival de Músicas Contemplativas. Trátase dunha iniciativa cultural ligada ao patrimonio da cidade histórica de Santiago, creado e organizado polo Consorcio de Santiago, e que, este ano, conta coa colaboración da S. A. de Xestión do Plan Xacobeo. Segundo anunciaron en rolda de prensa o director-xerente do Xacobeo, Ignacio Santos, o alcalde de Santiago, Xosé A. Sánchez Bugallo e o xerente do Consorcio de Santiago, Xosé Manuel Villanueva Prieto, en total serán 15 concertos que terán como escenario 7 espazos históricos da cidade e nos que se darán cita tradicións musicais de oriente e occidente, nunha sorte de diálogo cultural.

Así, entre o 29 de marzo e o 3 de abril as igrexas de San Martiño Pinario, Convento do Carme, San Francisco, San Paio de Antealtares, Ánimas, Universidade e a Capela do Hostal dos Reis Católicos acollerán diferentes concertos de grupos instrumentais e solistas vocais de Europa, Asia e América, representantes de diferentes tradicións musicais, e cuxas músicas soarán en latín, grego, hebreo, árabe ou mongol, entre outras linguas. Os artistas proceden de Inglaterra, Vietnam, Francia, Mongolia, India, Exipto, Finlandia, Azerbaixán, Irán, Italia, Ouzbekistán e Estados Unidos.

Trátase polo tanto dun festival que transmite un forte compromiso intelectual no marco dun mundo cada día máis globalizado; unha iniciativa que quere abrir pontes, fomentar o coñecemento entre os pobos e as culturas e ser un diálogo musical aberto.

O Festival de Músicas Contemplativas está moi relacionado co patrimonio histórico de Santiago, polo que ao pracer de escoitar únese o pracer de contemplar a riqueza histórica e artística das diferentes igrexas da cidade histórica compostelá. A política de recuperación do patrimonio arquitectónico levada a cabo polo Consorcio de Santiago ten nesta nova edición do Festival de Músicas Contemplativas un dos seus obxectivos prioritarios: dotar dunha nova dimensión a impresionante herdanza histórica e monumental dos edificios restaurados, converténdoos durante uns días en escenarios de primeiro nivel dun evento pensado para escoitar e contemplar.

O programa

O Festival arrinca o luns 29 de marzo co grupo inglés de música antiga The New London Consort, que na igrexa de San Francisco interpretará pezas de Bach e Praetorius, e coa cantante vietnamita Houng Thanh, na igrexa da Universidade. O día 30 de marzo será o turno de Fretwork Ensemble (Inglaterra), de Les Éléments (Francia) e da cantante procedente de Mongolia, Urna. O 31 de marzo as igrexas de San Martiño Pinario, Ánimas e Universidade acollerán os recitais de, respectivamente, Divana Ensemble (India), Enma Kirby & London Baroque (Inglaterra) e Sheikh Taha (Exipto). O 1 de abril actuarán a Helsinki Baroque Orchestra, o Hilliard Ensemble e o grupo procedente de Azerbaixán Alim & Fargana Qasimov. O 2 de abril, a Capela do Hostal dos Reis Católicos será escenario para a música e a poesía mística persa de Parissa. Tamén nesa xornada actuarán Il Suonar Parlante (Italia) e o Monâjat Yultchieva (Ouzbekistán). Finalmente, o 3 de abril pechará o festival a agrupación Kenneth Weiss, de Estados Unidos.

Dentro dos programas do Consorcio, a iniciativa do Festival de Músicas Contemplativas, creado no 2006, ven a ser un eslabón máis dentro da rede cultural que o organismo está a tecer de estruturas permanentes. Tal é o caso da consolidación da Real Filharmonía de Galicia, a Escola de Altos Estudos Musicais, a creación do programa de cultura científica “ConCiencia”, o “Compostela Organum Festival”, o “Premio Santiago de Compostela de Cooperación Urbana” ou o programa de publicacións.