Presentada a reedición dos nº 1 e 3 do Caderno de Estudos Chairegos

O vicepresidente da Deputación, o nacionalista Antón Bao, presentou na Casa da Cultura de Vilalba, acompañado do presidente do Instituto de Estudios Chairegos, Manuel Castro Santamariña, a reedición dos números 1 e 3 do Caderno de Estudios Chairegos que levou a cabo a asociación homónima co apoio da Área de Cultura da Deputación. A reedición destes dous números dos Cadernos de Estudios Chairegos, así como outras edicións e actividades promovidas pola asociación vilalbesa, púidose ver materializado grazas á estreita colaboración entre a Área de Cultura da Deputación e o Instituto de Estudios Chairegos.

Na súa intervención, o nacionalista Antón Bao destacou o “traballo abnegado do Instituto de Estudios Chairegos a prol da recuperación, revitalización e investigación do noso patrimonio cultural, sinal de identidade que nos identifica como pobo”. Por iso, Bao manifestou que “desde a entrada no goberno da Deputación, desde a Área de Cultura sempre tivemos claro que para dinamizar culturalmente Lugo e o País era necesario apoiar o asociacionismo, xerme de ideas e motor cultural e social”. Deste xeito, Antón Bao remarcou que “a Deputación de Lugo estará sempre axudando a todos aqueles colectivos que, como o IESCHA, traballan para manter vivos unha cultura, un idioma – e máis nestes tempos nos que se está vendo continuamente ameazado a teor da resposta social que hoxe vai haber a favor do fomento da lingua- e todos aqueles elementos culturais que edificaron a nosa historia como pobo e cuxa preservación e valorización resultan fundamentais para manter viva a nosa identidade”.

Pola súa banda, o presidente do Instituto de Estudios Chairegos, Manuel Castro Santamariña, agradeceu todo o apoio recibido por parte da Área de Cultura da Deputación, “o que lle permite á asociación levar a cabo tarefas como a reedición que hoxe presentamos, de xeito que se cumpre unha demanda social, xa que os números estaban esgotados desde hai tempo e moitas persoas reclamaran insistentemente poder facerse cun volume”. Ademais, lembrou Santamariña que “grazas ao apoio da Deputación, púidose realizar tamén o exitoso certame de pintura rápida ao aire libre ou celebrar o 5º Día da Cultura Chairega coincidindo co 5º cabodano de Manuel María”, polo que agradeceu que este apoio continuase o vindeiro ano “xa que proxectos non nos faltan”.