O BNG lamenta a paralización do sector das artes escénicas

A portavoz de Cultura e deputada do BNG, Ana Pontón considera que só “a actitude de revanchismo do Partido popular co anterior goberno” fai que as artes escénicas vexan paralizado o PGAE coa conxelación de fundos, así como “unha manifesta incapacidade” para nomear as persoas que deben dirixir o Centro Dramático Galego e o Centro Coreográfico Galego.

Para a deputada do Bloque Nacionalista Galego, unha vez máis, o Partido popular “minte cando fala de débedas, en relación con AGADIC” e reitera que o problema económico “foi creado polo actual goberno ao retirarlle un 1 millón de euros a esta asociación sen explicar cal será o destino deses fondos”.

A deputada nacionalista lembra que o Plan Galego das Artes Escénicas tiña varios obxectivos entre os que cumpre salientar: promover a dimensión sociocultural das actividades escénicas, consolidar e fomentar os procesos de creación, innovación e formación, así como poñer en valor o patrimonio escénico galego, potenciar e promover as industrias vinculadas ás artes escénicas en Galiza e consolidar o seu mercado.

Asemade, Pontón afirma que para o desenvolvemento destas liñas estaban destinados un total de 65 millón de euros entre 2008-2011 e que agora os anuncios do Goberno galego só confirma o que xa tiña denunciado o BNG: “ estes meses foron de total parálise no ámbito cultural e o Goberno do PP lonxe, de impulsar e promocionar a nosa cultura, é un atranco no seu desenvolvemento”.

Ana Pontón cualifica de “irresponsábel” a actitude da Consellaría de Cultura que ante un ano Xacobeo , está a permitir que “o teatro e a danza institucionais sigan descabezados”.

Asemade, denuncia que na liña para potenciar e promover as industrias vinculadas ás artes escénicas no ano 2010, xa estaba prevista unha dotación de 3 millóns de euros, dotación que agora o conselleiro anuncia conxelará.

Finalmente, a deputada do BNG reclama unha rectificación da Rede de Teatro incrementando os recursos para a distribución e exhibición da produción galega e recomenda que a Consellaría de Cultura retome a filosofía do Plan Galego das Artes Escénicas no que atinxe a “ garantir a existencia dos espectáculos de teatro e danza feitos en Galiza dentro dos contextos xeográfico e cultural globais, mediante a progresiva capitalización ,modernización e autonomía dos seus xeitos de produción.”