A Fundación Galicia Europa entrega os premios do certame fotográfico Galicia innovadora e creativa

O director xeral de Promoción e Difusión da Cultura, Francisco López, e o director xeral de Relacións Exteriores e coa Unión Europea e Director-Apoderado da Fundación Galicia Europa, Jesús Mª Gamallo Aller entregaron os premios do Concurso Fotográfico “Galicia Innovadora e Creativa” na Fundación Torrente Ballester. A contía dos premios ascende a 6.000 euros, repartidos nun primeiro premio de 3.000 euros, 2.000 euros o segundo e 1.000 euros o terceiro.

Francisco López afirmou que desde a súa dirección xeral se traballa coa idea de que a arte “abra camiños de progreso, de que as creadoras e os creadores afonden na realidade para dar novas visións e abrir a nosa intelixencia a outras perspectivas, como vangardas do pensamento colectivo”. “Vivimos no século da imaxe, é o xeito inmediato de facernos entender e de chegar a ámbitos culturais moi distantes pasa por coñecermos as formas alleas e por transmitir as nosas, por saber das paisaxes e das relacións cromáticas que establecemos e que outros establecen”, engadiu.

Asemade, o director xeral de Promoción e Difusión da Cultura gabou a iniciativa da Fundación Galicia Europa, por “constituir un estímulo magnífico para erguer esa mirada, para traer ante nós as novas perspectivas, os novos aspectos de nós mesmos que dexerga a fotografía, e para animar esta comunicación imparable, que abre camiños de fraternidade e de cooperación”.

Francisco López declarou que o interese da Consellería de Cultura e Turismo “é que Galicia, coa celebración do Xacobeo 2010, que rubricaremos co Ano do Libro e da Lectura, tome consciencia do seu papel crucial na cultura europea, e que, logo de recibir durante milenios a achega de países distantes, asuma a condición de emisora do seu inmenso capital intelectual, na unidade e no apoio de todas e de todos a unha sociedade madura”.

Concurso fotográfico

A temática deste certame organizado pola Fundación Galicia Europa e pola Dirección Xeral de Promoción e Difusión da Cultura baseouse na celebración do Ano Europeo 2009 da Creatividade e a Innovación. Desde as institucións europeas consideran fundamental potenciar as aptitudes creativas da poboación para responder efectivamente aos desafíos e oportunidades da globalización e á situación de crise actual. Neste senso, as fotografías debían centrarse en aspectos nos que Galicia evolucionou e progresou máis nos últimos anos.

Para levar a cabo a selección, valorouse a calidade técnica e a habilidade fotográfica dos participantes, así como a súa capacidade para transmitir a imaxe dunha Galicia creativa e innovadora. De acordo con estes aspectos, a comisión seleccionou 9 obras co fin de que constitúan unha exposición itinerante que recorrerá as catro provincias galegas, e que finalizará o seu recorrido en Bruxelas, ante representantes das institucións e das rexións europeas.