Investigadores sobre o franquismo reúnense en Santiago de Compostela

Desde hai case vinte anos celébrase en distintos puntos de España o Encontro de Investigadores sobre o franquismo. Nesta ocasión, a organización da sétima edición correspóndelle ao Departamento de Historia Contemporánea e de América da USC en colaboración coa Fundación 10 de Marzo.

Este VII Encontro, que se desenvolve en Santiago entre os días 11 e 13 de novembro, aspira a dar un paso máis no coñecemento do que foi a ditadura “polo que abre as súas portas a todos aqueles investigadores que actualmente traballan sobre este período histórico”, indicou o profesor da USC Daniel Lanero, que estivo acompañado na presentación do director da área de Historia da Fundación, Víctor Santidrián.

O encontro desenvolverase arredor de seis mesas de discusión sobre Mundo do traballo; Migracións e exilios; Identidades e conflitos territoriais; Dinámicas políticas durante o franquismo; Sociedade e movementos sociais; e Cultura e opinión. En cada unha delas un relator analizará as comunicacións presentadas, marcando as liñas do debate que se abrirá a continuación.

Respecto ás edicións anteriores, este ano o encontro contempla a novidade de dúas mesas redondas; a primeira será unha posta ao día dos estudos sobre o franquismo, mentres que na segunda debaterase sobre un ámbito da investigación moi prolífico nestes últimos anos como é a represión. Ademais, tamén este ano por primeira vez durante todo o encontro os asistentes coñecerán os pósteres que sobre a represión presenten os investigadores procedentes do mundo académico ou das numerosas asociacións que traballan neste campo.

Expertos de renome

Será o mércores 11 cando ás 11:30 horas no Paraninfo da Universidade (Facultade de Xeografía e Historia) se inaugure o encontro, que logo desenvolverá todas as xornadas no Salón de Actos da Facultade de Filosofía. A encargada de pronunciar a conferencia inaugural será a escritora Esther Tusquets, unha das referencias do mundo editorial español dende a década de 1960, tanto dende a editorial Tusquets como dende Lumen. Autora de máis dunha quincena de novelas e libros de relatos, o seu último libro, de carácter autobiográfico e onde reflicte o mundo de valores da burguesía conservadora da Barcelona de posguerra, é Habíamos ganado la guerra (2008).

A partir de aí sucederanse numerosos relatorios de expertos de renome como Emilio Silva Barrera, fundador e presidente da Asociación por la Recuperación de la Memoria Histórica (ARMH); Jordi Gràcia, un dos maiores coñecedores da historia cultural do franquismo e da transición; Manuel Loff, especialista na análise do franquismo e do salazarismo en perspectiva comparada; ou Carme Molinero, experta na análise da evolución sociopolítica do franquismo, entre outros.