O fotógrafo Xosé Manuel Otero presenta a mostra Elas

O fotógrafo Xosé Manuel Otero trae ao Edificio Multiusos da Xunta a súa colección “Elas”, incluída este ano no Outono Fotográfico, e que poderá ser visitada ata o 27 de novembro.

O Outono Fotográfico é un evento subvencionado pola Dirección Xeral de Xuventude, organizado pola Casa da Xuventude de Ourense pero que presenta exposicións en máis de 20 cidades e vilas das catro provincias galegas.

Otero forma parte do grupo fotocinematográfico Fonmiñá, que tradicionalmente colabora co Outono Fotográfico para traer a Lugo algunha das exposicións da mostra e que este ano logrou achegar a colección do fotógrafo taboadés.

A Delegación Territorial da Xunta colabora nesta exposición cedendo a sala do edificio administrativo, así como na montaxe e difusión deste acontecemento cultural. A mostra poderá ser visitada en horario de mañá (9.00 a 14.00).

Na presentación da exposición participou o propio autor, acompañado polo responsable de Coordinación Administrativa da Consellería de Traballo e Benestar, Vicente Correa, así como polo presidente e o vocal de fotografía do grupo Fonmiñá, Xulio Xiz e Eduardo Rodríguez Ochoa, respectivamente.

Xosé Manuel Otero é un fotógrafo de formación autodidacta, traballa indistintamente en cor ou branco e negro, con inclinación cara aos temas paisaxísticos e os retratos. Ten realizado exposicións individuais na Sala Fonmiñá de Lugo dende 1997, e tamén participou nas edicións do Outono Fotográfico dos anos 1999 –cunha colección sobre a Ribeira Sacra que foi adquirida polo Museo Etnográfico de Ribadavia-, 2000 e 2003.

Elas é unha colección de 25 fotografías que teñen como denominador común a imaxe da muller, captada en diversas actitudes e dende distintas perspectivas.