Compostela acolle o VII Encontro de Educación Infantil

O Conselleiro de Educación e Ordenación Universitaria, Xesús Vázquez Abad, inaugurou o VII Encontro de Educación Infantil que se celebra no Palacio de Congresos, en Santiago de Compostela. Nos obradoiros e conferencias organizadas en torno a este evento asistirán 525 docentes de Educación Infantil.

Durante o acto de inauguración Vázquez Abad destacou que ”estes encontros se constitúen como un foro de debate e actualización nas primeiras etapas de aprendizaxe. Este é un espazo de intercambio entre os docentes”. O conselleiro subliñou que a Educación Infantil correspóndese cun período da vida dos nenos e nenas, que constitúe “un espazo de vivencias e recreación cultural, valorando a educación como fonte de cultura transformada en coñecementos e saberes que potencien o desenvolvemento de habilidade, procedemento para pensar e interpretar o mundo, facilitando a conceptualización global da realidade que teñen os nenos e nenas desta etapa”.

No mesmo acto o conselleiro aproveitou para destacar o labor dos docentes de infantil aos que se dirixiu nos seguintes termos: “Os meus parabéns, pois sodes un dos colectivos máis participativos nas actividades de formación. Dende a Consellería apostamos por este profesorado que investiga e innova a prol da mellora do sistema educativo”.

O encontro ten como obxectivo o intercambio de experiencias e coñecementos entre os docentes desta etapa educativa. Unha reunión que promove a actualización dos docentes ao tempo que se dan a coñecer as principais liñas do Plan de Formación. Profesorado para o vindeiro curso. Entre os puntos que se tratarán destaca a implantación da LOE, e o novo currículo de Educación Infantil.

Ademais, nesta edición aproveitarase para reformular a práctica educativa. O enfoque por competencia modifica os puntos de vista convencionais sobre a forma de aprender e de ensinar sendo o principal o desenvolvemento das posibilidades do individuo mediante fórmulas de saber e facer contextualizadas.

Programa

Os asistentes terán a posibilidade de asistir ás conferencias de destacadas personalidades no mundo educativo como é o caso da coordinadora de proxectos de formación de profesores en diferentes rexións de España, Myriam Nemirovsky Taber. Ademais pasaran polo estrado a directora de “Proxectos pedagóxicos”, Amparo Escamilla González, a directora de “Casa Creativa” Angélica Sátiro, e a especialista en Intelixencia Emocional, María do Mar Romera Morón.

O programa completo está dispoñible no portal educativo da Consellería de Educación na dirección http://centros.edu.xunta.es/contidos/asesoriainfantil/.