Bruno Villamor, primer lucense con titulación superior en música tradicional

Bruno Villamor Gay, converteuse no primeiro lucense que obtén a titulación superior de música na especialidade de Instrumentos da Música Tradicional Galega. O pasado martes día 16 de xuño ofreceu no Auditorio “Martín Codax” do Conservatorio Superior de Música de Vigo o concerto de fin de carreira, no que estivo acompañado polos músicos Miguel Anxo López Buján (tamboril), Pablo Pardo Rodríguez ( bombo), Marisa Dapereira Portela (acordeón) , Miguel Valls (piano) e Juan Barcón Peña (gaita).

Esta titulación é equiparable a unha licenciatura, sumando os cursos de Grao Elemental, Grao Profesional e Grao Superior, ten unha duración de 14 anos. Na actualidade, soamente se pode cursar no Conservatorio Superior de Música de Vigo, sendo necesario para acceder a ela ter acadado o Grao Medio LOXSE de Gaita e ademais realizar unha proba de admisión.

Bruno Villamor iniciou a súa andanza na música tradicional sendo un neno da man de mestres como Enrique Candal e Pepe Vaamonde. Posteriormente continuou os seus estudos alcanzando o título de gaita en Grao Medio LOXSE no Conservatorio Profesional de Vilalba baixo a tutela de Xose Ramón Saborido. Foi entón cando inicia o Grao Superior en Vigo, da man de Rebeca Carrera.

Actualmente, é profesor de Gaita no Conservatorio Profesional de Vilalba, na escola de Música Municipal de Meira e na Tradescola. É director artístico da Asociación Cultural “Cántigas e Frores” de Lugo e profesor de Gaita e Percusión Tradicional en diversas asociacións culturais das provincias de Lugo e A Coruña.

É membro fundador do Grupo de Música Tradicional “Os Miñotos” .
Foi integrante do grupo folc “Caldaloba”, co que ten gravado o disco “As Cores da Música”(1999). Ademais ten colaborado en outras gravacións como o CD – Libro – DVD “13 Lúas” editado pola “Asociación de Gaiteiros Galegos”, o CD “Mira como veño” do grupo “Canta Tí”, ou o CD “Raices y Tradiciones” co grupo “Cántigas e Frores” editado pola FEAF.
Ten varias publicacións, estando agora mesmo inmerso no seu derradeiro proxecto, que consistirá na publicación dun Método de Gaita que recibirá o nome de “Temperando” (editorial Dos Acordes) co que o autor pretende aportar un pequeno grao de area na bibliografía para gaita.