Presentación do Plan Estratéxico dos Xogos e Deportes Tradicionais

A directora xeral para o Deporte, Marta Souto, presentou a xornada “Plan Estratéxico dos Xogos e Deportes Populares e Tradicionais” que terá lugar o próximo domingo 8 de febreiro no Pazo de Congresos e Exposicións de Santiago de Compostela e na que se presentará o estudo “A realidade dos xogos e deportes populares e tradicionais nos concellos galegos”. Ao acto tamén asistiron Constantino Arce, coordinador do estudo, e Rosa Muñíz, representante da cooperativa Cidadanía que realizou o deseño do Plan Estratéxico.

Durante a rolda de prensa, a directora xeral explicou que este estudo ten como obxectivo “dar a coñecer a todo o país o noso deporte tradicional, así como dinamizar e posibilitar a súa transmisión a todas e todos os galegos”.

Asemade, Marta Souto agradeceu a todos os clubs galegos que se implicaron na difusión e dinamización dos deportes populares e tradicionais galegos e, ademais, recordou o “éxito” que tivo a posta en marcha da liga nacional de billarda, as ligas galegas de chave e traíñas ou o campionato de bolos e outras modalidades.

Pola súa parte, Constantino Arce, que recoñeceu que este estudo é “pioneiro” no noso país, desvelou que “durante a xornada do 8 de febreiro se presentarán os datos referidos á situación dos xogos e deportes populares e tradicionais en Galicia xa que mostran conclusións moi significativas relativas a diferentes aspectos”. Uns resultados que Arce non dubidou en asegurar que se convertirán nunha “boa ferramenta” para que os axentes políticos e sociais asuman “a elaboración do Plan como algo propio de cara a garantir a súa sostibilidade e continuidade”.

Finalmente, Rosa Muñíz destacou que “este Plan Estratéxico responde a necesidade de contar cunha ferramenta útil dende o ámbito cultural, deportivo e económico para poñer en valor o traballo que moitas federacións están facendo a prol do Deporte Tradicional Galego por todo o país”. “É importante lograr a implicación das persoas participantes na xornada e xerar unha rede de intercambio e coñecemento, procurando a participación e implicación social das diferentes entidades públicas e privadas de Galicia”, incidiu Muñíz.

A xornada comezará as 10:15 coa presentación das liñas estratéxicas para o fomento dos xogos e os deportes populares e tradicionais en Galicia (infraestruturas e actividades de promoción) e, posteriormente, realizarase a presentación dos resultados do estudo “A realidade dos xogos e deportes populares e tradicionais nos concellos galegos”.