Domingo Goás Chao, homenaxeado pola Asociación de Amigos da Muralla de Lugo

A Asociación de Amigos da Muralla de Lugo entregou este xoves, na Muralla lucense, a súa medalla e diploma de admirador da Muralla ó vilalbés residente en Madrid Domingo Goás Chao, titular do bufete de avogados Goas-Rico e Presidente do Consello de Administración de Interdix Galicia-Galicia Dixital.

Así mesmo, o Presidente da Agrupación, Alfredo Sánchez Carro, entregou cadanseu diploma ós avogados deste bufete madrileño, Cristina Moreno Renedo, Felipe Bances Handschuh e Julio Rico Esteban, así como a Alberto Goás Filliguer e Daniel Goás Filliger.






Con posterioridade, Domingo Goás interveu na revista oral Ronda, da Asociación de Amigos da Muralla de Lugo, onde falou da súa visión do monumento nos seus anos infantís e logo como especialista en urbanismo. Nesta sesión participaron Alfredo Sánchez Carro, que coordinou o desenvolvemento da revista oral; Francisco Rivera Cela entrevistando a Francisco Real, Presidente dos hosteleiros lucenses; Daniel Varela Piñeiro, sobre a Ronda Interior da Muralla; Xulio Xiz, cun editorial dedicado de xeito especial á irmandade entre a Muralla de Lugo e a Gran Muralla China, así como o debuxante Daniel Pérez Pereira (Danip), que realizou en directo unha viñeta sobre o monumento.