Christina Oiticica enterra parte da súa obra no claustro de Xeografía e Historia

A Vicerreitoría de Cultura da USC está a traballar xunto coa Fundación Via Galego na produción dunha mostra da artista brasileira Christina Oiticica, muller do escritor Paulo Coelho, que se poderá visitar en maio de 2009 na Igrexa da Universidade baixo o título Camiño Peregrino.

Christina Oiticia (Rio de Janeiro en 1951) é pioneira en aplicar
unha particular técnica nas súas obras, combinando land art e pintura. Cree na pegada visible e invisible que deixa a natureza nas obras, á que considera coautora dos seus cadros.

Como parte do proceso previo da exposición de 2009, a artista fai un enterramento de parte da súa obra no claustro da Facultade de Xeografía e Historia, onde permanecerá aproximadamente durante seis meses.

O acto estará presidido polo vicerreitor de Cultura, Elias Torres, e contará coa asistencia da propia autora, Christina Oiticica; da decana da Facultade de Xeografía e Historia, Mar Llinares; do director de actividades da Fundación Via Galego, Ângelo Gonçalves Vicente; e do representante de Christina Oiticica e Paulo Coelho en España, Acácio da Paz.

Christina Oiticia

Formada na Escola de Belas Artes e no Museo de Arte Moderna de Río de Janeiro, Oiticica completou a súa formación na Facultade de Arquitectura Bennett da mesma cidade e no Círculo de Belas Artes de Madrid. A autora comezou a expoñer tanto de xeito individual como colectivo en 1984.