Investigadores cubanos e galegos colaboran no libro De raíz profunda. Galicia y lo gallego en Cuba

Responsables da USC presentaron en Fonseca o libro De raíz profunda. Galicia y lo gallego en Cuba, editado conxuntamente pola institución docente compostelá e a Xunta de Galicia e presentado con grande éxito editorial na Feira do Libro de La Habana, situación que se repetiu tamén nesta beira do Atlántico e en todos os espazos académicos nos que se deu a coñecer. A presentación correu a cargo do vicerreitor de Cultura, Elias Torres; a profesora de Historia de América Pilar Cagiao; e o director académico do Servizo de Publicacións da USC, Antonio Azaustre.

Coordinado por Pilar Cagiao e polo director do Departamento de Historia da Universidade de La Habana Sergio Guerra, o libro mostra os vencellos históricos entre Galicia e Cuba dende unha óptica interdisciplinar. Precisamente no seu carácter de miscelánea é onde radica a orixinalidade do volume, “que abarca multitude de aspectos concretos relacionados coa emigración, o exilio ou as relacións culturais”, matizou a profesora Cagiao.

Na publicación recóllense catorce estudos elaborados por investigadores cubanos e galegos agrupados en tres apartados estreitamente ligados entre si. No primeiro, co epígrafe ‘Sobre a emigración galega a Cuba’ móstranse artigos que abarcan diversas cuestións dun tema inesgotable. Xa no segundo apartado, ‘Guerra Civil e exilio político’, os traballos dirixen a súa ollada ao doloroso conflito bélico que dividiu aos españois e a súa relación con Cuba. Finalmente, no último, ‘Cuba y Galicia’, ponse de relevo a relación cultural que algúns intelectuais cubanos tiveron cos galegos e con Galicia.

Entre outros temas, os artigos versan sobre a emigración de Teo a Cuba, o exemplo de Pedro Murias, a masacre fascista da familia Ramos Ferreiro en Galicia; o Centro Gallego da Habana e a Guerra Civil española; Fernando Ortiz e os galegos en Cuba; ou a contribución cubana á Biblioteca América da Universidade de Santiago.