Entregados os premios da SGAE na V Noite dos Autores

O presidente da Xunta, Emilio Pérez Touriño, asegurou no marco dunha gala organizada pola SGAE en Santiago, que Galicia ten feito da aposta pola creatividade e a innovación “un dos eixes principias sobre os que construír o seu presente e proxectar o seu futuro”. Así o destacou o presidente da Xunta na V Noite dos Autores, acto co que SGAE quixo recoñecer o labor creativo e a “capacidade para innovar e para emprender en calquera ámbito de actividade”.

Precisamente, o presidente da Xunta valorou a inclusión de diferentes empresas e institucións galegas na listaxe de entidades premiadas. Así, referiuse ao Grupo Inditex, ao Concello de Santiago, á Universidade de Santiago de Compostela ou ao Instituto Galego das Artes Escénicas e Musicais por ter sido distinguidas neste acto. Ao tempo, fixo extensivos os seus parabéns á Axencia EFE e a FASYDE, Asociacións Provinciais de Empresarios de Salas de Festa, Baile e Discotecas de España, tamén distinguidas nesta gala.

Fonte de inspiración continuamente actualizada

No decurso da súa intervención, Pérez Touriño afirmou, así mesmo, que ao apostar pola innovación, a creatividade e a cultura “non facemos outra cousa que revitalizar vellas tradicións e volver enlazar cun espléndido pasado cultural cuxa peza máis brillante e rematada é esta cidade de Santiago de Compostela”. En opinión de Touriño, o pasado cultural non é en Galicia “un capítulo pechado” senón “unha fonte de inspiración continuamente actualizada”.

Paralelamente, o presidente galego tivo unha mención especial para o proxecto da Cidade da Cultura. Neste sentido, asegurou que a Xunta traballa coa idade de que o complexo do Gaiás “se converta en meta das novas peregrinacións do século XXI, fortemente marcadas pola atracción que sobre as persoas exerce a creatividade e a excelencia cultural”.

“Ese horizonte marca un novo reto que asumimos con responsabilidade, con ilusión e coa seguridade de que Galicia saberá facer dese gran complexo arquitectónico e cultural unha nova proba da súa capacidade para crear, comunicar e construír futuro”, concluíu Touriño.