Convenio entre xornalistas e escritores galegos

O P.E.N Clube de Escritores de Galicia e a Federación de Asociacións da Prensa de Galicia (FAPG) asinaron un convenio marco de colaboración na sede do Club Internacional de Prensa de Santiago de Compostela.

O acordo ten como finalidade primordial a colaboración conxunta entre ambos colectivos para promover actividades como a creación dun premio de xornalismo literario e a celebración dun coloquio anual para profundizar na problemática de xornalistas e creadores literarios, coincidentes en moitas ocasións. Asemade tentarán interceder diante dos poderes públicos e a Administración para incluir a Galicia como terra de asilo para xornalistas e escritores presos, ou perseguidos, por defender a liberdade de expresión nos seus respectivos países. Para elo terase en conta informes de entidades de prestixio como o comité internacional do PEN, Amnesty International, Reporteiros sen Fronteiras e a International Federation of Journalists.

Asinaron o convenio marco, que terá vixencia anual prorrogable e unha comisión de seguimento, os presidentes do PEN Clube galego e da FAPG, Luís González Tosar e Manuel González Menéndez, respectivamente.