O semanario A Nosa Terra, gañador do VI Premio Ramón Piñeiro Facer País

A Asociación Val de Láncara, representada por Carlos López Sierra –secretario-, presentou no CIP o resultado das votacións do Xurado do VI Premio Ramón Piñeiro “Facer País”, en compañía do Alcalde de Láncara, Darío A. Piñeiro; Aníbal Piñeiro, irmau de Ramón Piñeiro; Xesús Tourón, representante das Asociacións Culturais da Comarca, e de Xurxo Rodríguez Lorenzo, director do Colexio Público “Ramón Piñeiro”.

A votación do Xurado deu como resultado que sexa o semanario “A Nosa Terra” quen este ano, sexa quen de gañar o Premio Ramón Piñeiro “Facer País”.

Acta da Xuntanza do Xurado:

VI PREMIO RAMON PIÑEIRO “FACER PAIS”

Na Casa de Láncara, o día vintese de agosto de 2007, reuníronse, previa convocatoria formal, para procederen á correspondente votación entre os candidatos propostos para a obtención do SEXTO PREMIO “RAMON PIÑEIRO LÓPEZ” de “FACER PAÍS”, as seguintes persoas:

- Manuel Fernández Arrojo, pola Asociación VAL DE LANCARA.
- Esther Carro Vázquez, pola Asociación O NOSO LAR, de Pobra de San Xiao-Láncara.
- Iago Bande, pola Asociación ALPENDRE de Pobra de San Xiao-Láncara.
- Xurxo Rodríguez Lozano, polo Colexio Público Ramón Piñeiro de Pobra de S. Xiao-Láncara.
- Celestino Rodríguez, en representación do Concello de Láncara.
- Xesús Vila Tourón, pola Sociedade Cultural e Recreativa LA UNION e CLUB UNESCO, de Sarria.
- Xosé Recimil Tábora, pola Asociación MUIÑEIRA de Sarria.
- Alba María López López, pola Asociación ARCAS e IRMANDADE SARRIA-GUERLEDAN, de Sarria.
- Julio Páramo López, polo Clube TEIXO de Sarria.
- Milagros Núñez Pérez, pola Asociación PELERIÑOS de Sarria.
- Jaime Félix López Arias, pola Asociación FORO XURIDICO SARRIAO “DIEGO PAZOS” de Sarria.
- Elvira Pallares, pola Asociación SARRICANTA de Sarria.

Actuou como Secretario de actas, o da Asociación convocante, Carlos S. López Sierra.

Aberto o Acto, fíxose relación das corenta e dúas candidaturas polas diferentes asociacións culturais galegas, con expresión dos méritos alegados polos respectivos presentadores.

Efectuada a votación, entre todas as candidaturas formalizadas, resultou ser premiada A NOSA TERRA, porque esta cabeceira xornalista, desde 1907, e por riba das dificultades e atrancos derivadas das continxencias políticas, sociais e económicas, mantivo sempre, mesmo dende o exilio, a defensa da identidade nacional de Galicia, sendo referencia activa e constante no proceso de difusión, normalización e xeralización do noso idioma escrito, plataforma onde confluiu ao longo dos anos o labor e compromiso coa Terra dos máis activos forxadores e defensores da súa identidade, sendo moitos deles víctimas da represión por causa do seu posicionamento a prol de Galicia. E tamén porque, adaptándose aos tempos, e a traverso dun proxecto editorial ambicioso e da presenza nas novas redes de difusión, contribúe de maneira destacable á recuperación da nosa memoria social.
Todos os presentes manifestaron a súa satisfacción pola designación acordada e facultan a “Asociación Cultural VAL DE LANCARA”, para que llo dea a saber á entidade premiada, a mayor brevidade, e programe os actos de homenaxe e entrega de galardón.
E non habendo máis asuntos que tratar levántouse a reuníon, e eu secretario certifico.