Inauguradas dúas novas salas do Arquivo Catedralicio de Compostela

A conselleira de Cultura e Deporte, Ánxela Bugallo, e o arcebispo de Santiago de Compostela, Julián Barrio, inauguraron dúas novas salas do Arquivo da Catedral. A Consellaría de Cultura financiou con 100.000 euros a realización destas instalacións que amplían o espazo de traballo para o estudo e utilización do Arquivo e, en especial, mellorar os servizos para investigadores.

As dúas salas, situadas no claustro da catedral e que até o de agora eran utilizadas como almacéns, contan cunha zona de depósito e con outra deseñada para a investigación. Nas obras de acondicionamento, a Consellaría revestiu as paredes e renovou as estruturas de madeira tanto do chan como do teito; así como as instalacións eléctricas e parte do mobiliario. Tívose especial interese na recuperación dun dos teitos de madeira, que conta cunha decoración de artesa invertida.

Na visita ás novas salas a conselleira e o arcebispo estiveron acompañados polo director xeral de Patrimonio Cultural, Felipe Arias, e polo Deán, José María Díaz.

Xunto á mellora das instalacións do Arquivo, a Consellaría tamén financia con 40.000 euros os labores técnicos de dúas persoas especializadas en arquivística que se encargan de organizar o arquivo e de atender ás persoas usuarias.

Así mesmo, coa colaboración do departamento que dirixe Ánxela Bugallo vénse de publicar a Guía do Arquivo da Cateral de Santiago. A elaboración deste libro, no que se empregan as normas internacionais de descrición arquivística, permitirá mellorar a busca de información no fondo do Arquivo, continuar co labor de investigación e facilitar o intercambio de datos a nivel internacional na medida en que se utilizan sistemas internacionalmente recoñecidos.

Por outra banda, a Consellaría de Cultura e o Arcebispado asinarán en breve un convenio de colaboración por valor de 15.000 euros para crear un sistema homoxéneo de descrición do Arquivo Diocesano, é dicir, o correspondente a toda a Diócese e non só á Catedral. Esta actuación forma parte dun programa de ordenación e normalización dos arquivos eclesiásticos do que tamén forman parte, entre outros, os arquivos de Tui e de Lugo.