Comeza o curso sobre as literaturas infantís e xuvenís ibéricas

A Sala Sarmiento da Facultade de Ciencias da Educación de Santiago de Compostela, acolleu a inauguración do IV Curso de Formación Continua As literaturas infantís e xuvenís ibéricas. A súa influencia na formación lectora. Teatro infantil: texto e representación, organizado pola Biblioteca Fundación Caixa Galicia en colaboración coa Universidade de Santiago.

Blanca-Ana Roig Rechou (Universidade de Santiago de Compostela), Pedro Lucas Domínguez (Biblioteca Fundación Caixa Galicia) e Adriana Gewerc (Universidade de Santiago de Compostela) deron a benvida ao alumnado, ensináronlles a navegar polo curso virtual e a facer uso das ferramentas de comunicación (foro, chat e correo electrónico).

Ademais, entregáronselles aos asistentes as súas claves de acceso e informaráselles de que se ampliou a matrícula e de que, polo tanto, o curso virtual se prolongará ao longo do mes de agosto. Neste curso están matriculadas máis de 120 persoas.

O profesorado, comunicantes e participantes nas distintas mesas representan a todos os axentes que fan posible a comunicación literaria: investigadores de todo o marco ibérico, é dicir, casteláns, cataláns, vascos, portugueses e galegos; editores, escritores, libreiros, bibliotecarios e profesores, que reflexionarán sobre as literaturas infantís e xuvenís do marco ibérico, a súa influencia na formación lectora e sobre o teatro infantil.

A parte presencial do programa desenvolverase do 10 ao 13 de setembro en xornada de mañá e tarde na Biblioteca Fundación Caixa Galicia. A finalidade deste curso é afondar nunha temática, as literaturas infantís e xuvenís dos ámbitos lingüísticos ibéricos, xeralmente excluída dos planos de estudo das licenciaturas e diplomaturas e, sen embargo, dunha transcendencia fundamental en ámbitos básicos como a formación lectora e a expresión escrita no mundo das novas tecnoloxías da información e da comunicación.