Presentado o libro: Pro Mundi Beneficio, que abre unha nova colección sobre a Galicia Exterior da FBM e o CCG

Tivo lugar a sinatura do convenio de colaboración entre a Fundación Pedro Barrié de la Maza e o Consello da Cultura Galega para a creación da serie editorial Galicia exterior, que integrará publicacións adicadas a recuperar o patrimonio da galeguidade máis aló de fronteiras e límites territoriais. No acto estiveron presentes José María Arias Mosquera, vicepresidente da Fundación, e Ramón Villares, presidente do Consello da Cultura Galega, así como Juan Manuel Pérez, autor de Pro Mundi Beneficio: los trabajadores gallegos en la construcción del canal de Panamá (1904-1914), libro que abre a serie e que foi presentado tras asinar o convenio entre ambas as entidades.

Ramón Villares falou de dúas Galicias “a territorial europea e a diáspora, da que por moito que se traballe sempre será insuficiente”. O presidente do Consello da Cultura Galega manifestou a súa satisfacción por esta colaboración cunha Fundación que forma parte da institución dende a súa creación. Tamén precisou que “as obras que vexan a luz terán a marca de identidade da Fundación Barrié, que conta cunha tradición e crítica moi positiva nas súas publicacións”. Nestes momentos estase preparando un segundo texto, A Galicia Antillana: formación e destrucción da identidade galega en Cuba (1899-1968), de José Antonio Vidal. Outros temas da serie serán a presenza dos galegos en Bos Aires e os indianos no mundo educativo e cultural galego.

José María Arias calificou o convenio como “un paso más en lo que la Fundación viene desarrollando desde hace 40 años con un servicio de publicaciones bibliográficas de calidad para difundir el patrimonio gallego”. En total, editáronse 442 títulos que sobrepasan os tres cuartos do millón de libros editados, dos que 300.000 foron doados. A serie Galicia Exterior será a cuarta que lanza a Fundación Pedro Barrié de la Maza, precedida por Galicia Historia, Galicia Viva e Biblioteca Filolóxica Galega.

O libro que abre a colección, Pro Mundi Beneficio: los trabajadores gallegos en la construcción del canal de Panamá (1904-1914), foi calificado por Ramón Villares como “un resultado azaroso dunha serie de circunstancias”, entre as que citou que o autor sexa galego, especialista en Historia de América Latina e que traballe na Biblioteca do Congreso dos Estados Unidos. Foi alí onde, avaliando material sobre o Canal, descubriu tres fotos que identificaban a traballadores galegos. “A raíz de eso me puse a investigar y descubrí que de los 9.000 españoles que estaban trabajando allí, más de 5.000 eran de Galicia y se les pagaba el doble que al resto por su enorme labor”, comentou Juan Ramón Pérez durante a presentación dunha obra, máis humana que técnica segundo as súas propias palabras, que se empezou a xestar na súa cabeza hai 10 anos e “para la que siempre conté con el apoyo de la Fundación”.